മാതൃഭാഷ അവകാശജാഥ ജില്ലയില്‍
കോഴിക്കോട്: മലയാള മാധ്യമ പൊതുവിദ്യാലയങ്ങള്‍ സംരക്ഷിക്കുക, തൊഴില്‍ പരീക്ഷകളും പ്രവേശന പരീക്ഷകളും മലയാളത്തിലാക്കുക, കോടതിഭാഷ മലയാളമാക്കുക, ഒന്നാം ഭാഷ ഉത്തരവ് പൂര്‍ണമായും നടപ്പാക്കുക, മലയാള നിയമം നടപ്പില്‍വരുത്തുക തുടങ്ങിയ ആവശ്യങ്ങള്‍ ഉന്നയിച്ച് നടത്തുന്ന മാതൃഭാഷ അവകാശജാഥ ജില്ലയിലെത്തി.
ഇന്നലെ വൈകിട്ട് വടകരയിലായിരുന്നു ആദ്യ സ്വീകരണം. ജാഥയ്ക്ക് ഇന്നു രാവിലെ ഒന്‍പതിനു കൊയിലാണ്ടിയിലും 11ന് ബാലുശ്ശേരിയിലും സ്വീകരണം നല്‍കും. തുടര്‍ന്നു വയനാട് ജില്ലയിലേക്ക് പ്രവേശിക്കുന്ന ജാഥ നാളെ രാവിലെ ഒന്‍പതിന് വീണ്ടും കോഴിക്കോട് ജില്ലയിലെത്തും.
ഒന്‍പതിന് കൊടുവള്ളിയില്‍ നല്‍കുന്ന സ്വീകരണത്തിനു ശേഷം 11ന് കോഴിക്കോട്ട് എത്തിച്ചേരും. കഴിഞ്ഞ 22ന് കാസര്‍ക്കോട്ട് നിന്ന് തുടങ്ങിയ ജാഥ 31ന് തിരുവനന്തപുരത്ത് സമാപിക്കും.