തിരുവനന്തപുരം: ഗാര്‍ഡ് ഡ്യൂട്ടി നോക്കുന്ന പൊലിസുകാര്‍ക്ക് പ്ലാസ്റ്റിക് പൊതികളില്‍ ഭക്ഷണം നല്‍കുന്നത് ഒഴിവാക്കാന്‍ നിര്‍ദേശം നല്‍കിയതായി മുഖ്യമന്ത്രി പിണറായി വിജയന്‍ നിയമസഭയെ അറിയിച്ചു.
ഡി.ജി.പി ഇതുസംബന്ധിച്ച നിര്‍ദേശം പൊലിസ് ഉദ്യോഗസ്ഥര്‍ക്ക് നല്‍കിയിട്ടുണ്ട്. കേരളത്തില്‍ ഡിവൈ.എസ്.പി മുതല്‍ സി.പി.ഒ വരെയുള്ള തസ്തികകളില്‍ 3,691 വനിതാ പൊലിസ് ഉദ്യോഗസ്ഥര്‍ സേവനമനുഷ്ഠിക്കുന്നുണ്ട്.
 അരുവിക്കര, പേരാമ്പ്ര, കുറ്റ്യാടി എന്നിവിടങ്ങളിലായി വാട്ടര്‍ അതോറിറ്റിയുടെ കീഴില്‍ ബോട്ട്‌ലിങ് യൂനിറ്റിന്റെ പ്രവൃത്തി നടന്നുവരുന്നതായി മന്ത്രി മാത്യു ടി.തോമസ് അറിയിച്ചു.
തിരുവനന്തപുരത്തുനിന്ന് കോഴിക്കോട്ടേക്ക് ലോ ഫ്‌ളോര്‍ സര്‍വിസുകള്‍ നടത്തുന്നകാര്യം പരിശോധിക്കുമെന്ന് മന്ത്രി എ.കെ ശശീന്ദ്രന്‍ അറിയിച്ചു. സംസ്ഥാനത്ത് എന്‍ജിനിയറിങ് കോളജുകളില്‍ മെറിറ്റ് സീറ്റില്‍ മാത്രമായി 15,647 സീറ്റുകള്‍ ഒഴിഞ്ഞു കിടക്കുന്നതായി മന്ത്രി സി.രവീന്ദ്രനാഥ് അറിയിച്ചു.