മണലൂര്‍: തണ്ണീര്‍ കായല്‍ ഉള്‍പ്പടെയുള്ള മണലൂര്‍ മണ്ഡലത്തിലെ പാടശേഖരത്തില്‍ കൃഷിയിറക്കുന്നതിന്റെ ഭാഗമായി ഇട ചാലുകള്‍ ആഴം കൂട്ടി തുടങ്ങി. വെങ്കിടങ്ങില്‍ ഗ്രാമപഞ്ചായത്തിന്റെ തൊഴിലുറപ്പ് തൊഴിലാളികളാണ് ഇതിനായി രംഗത്തുള്ളത്. കോള്‍, പുഞ്ചപാടങ്ങള്‍ എന്നിവിടങ്ങളിലെല്ലാം കാലവര്‍ഷമില്ലാത്തതിനാല്‍ കടുത്ത വരള്‍ച്ചയെ നേരിടേണ്ടി വരുമെന്നുറപ്പായതോടെ ഗ്രാമപഞ്ചായത്ത് ഭരണസമിതികളുടെ പ്രത്യേക നിര്‍ദേശത്തെ തുടര്‍ന്നാണ് വെള്ളമില്ലാത്തതിനാല്‍ കൃഷിയുണങ്ങാതിരിക്കാന്‍ കൈകോട്ടുമായി വനിതകള്‍ ഇട ചാലുകള്‍ തേടിയിറങ്ങിയത്. ഏക്കര്‍ കണക്കിന് പാടശേഖരത്തിന് ചുറ്റുമാണ് ഇട ചാലുകളുള്ളത്. ചാലുകളിലേക്ക് വലിച്ചെറിഞ്ഞ കുപ്പികളുള്‍പ്പടെയുള്ള മാലിന്യങ്ങള്‍ ഒഴിവാക്കാന്‍ തൊഴിലാളികള്‍ പാടുപ്പെട്ടു.