ശ്രീകണ്ഠപുരം: ആറുബൈക്കുകള്‍  മോഷ്ടിച്ച അഞ്ച് കൗമാരക്കാരെ ശ്രീകണ്ഠപുരം പൊലിസ് ബൈക്കുകള്‍ സഹിതം പിടികൂടി. കൊയ്യം വളക്കൈ റോഡില്‍ വാഹന പരിശോധന നടത്തവേ കൈകാണിച്ചിട്ടും നിര്‍ത്താതെ പോയ കൗമാരക്കാരനെ പിന്തുടര്‍ന്ന് പിടികൂടിയപ്പോള്‍ ബൈക്കിന് രേഖകളില്ലായിരുന്നു. ഇന്നലെ രാത്രിയില്‍ നടത്തിയ പരിശോധനയില്‍ പിന്തുടര്‍ന്ന് പിടികൂടിയ 16 കാരന്റെ ബൈക്ക് പരിശോധിച്ചപ്പോള്‍ ബൈക്കിന്റെ ചെയ്‌സ് നമ്പര്‍ ചുരണ്ടി മാറ്റിയതാണെന്നും തെളിഞ്ഞു. ഈ ബൈക്കിന്റെ നമ്പര്‍ പ്ലേറ്റും വ്യാജമായിരുന്നു. കുട്ടി മോഷ്ടാവിനെ ചോദ്യം ചെയ്തപ്പോള്‍ മറ്റുള്ളവരെക്കുറിച്ച് വിവരം ലഭിച്ചു. തുടര്‍ന്ന്‌പൊലിസ് പുലര്‍ച്ചെ 2.30 ന് കണ്ണൂര്‍ സിറ്റിയിലെത്തി രണ്ട് പേരെ കസ്റ്റഡിയിലെടുത്തു. രണ്ടു ബൈക്കുകളും ഇവരില്‍ നിന്ന് കണ്ടെടുത്തു. പിന്നീട് മയ്യില്‍ കണ്ടക്കെയില്‍ നിന്ന് മൂന്ന് ബൈക്കുകള്‍ സഹിതം രണ്ടുപേരെ കസ്റ്റഡിയിലെടുത്തു. പിടിയിലായവരെല്ലാം സുഹൃത്തുക്കളും ബന്ധുക്കളുമാണ്. ബൈക്കുകളുടെ ചെയ്‌സ് നമ്പര്‍ചുരണ്ടി മാറ്റി പുതിയത് എഴുതിവച്ച് നമ്പര്‍ പ്ലേറ്റ് മാറ്റി പെയിന്റടിച്ചു വില്‍ക്കുകയാണ് ഇവരുടെ പതിവ്. അടിപൊളി ജീവിതത്തിനു വേണ്ടി ബൈക്ക് മോഷ്ടിക്കുന്ന ഇവര്‍ക്ക് വ്യാജ താക്കോല്‍ നിര്‍മിച്ചു നല്‍കുന്ന വര്‍ക്ക്‌ഷോപ്പ് ജോലി അറിയുന്ന സിറ്റിയിലെ ചിലരെക്കുറിച്ച്  പൊലിസിന് വിവരം ലഭിച്ചിട്ടുണ്ട്. സി.ഐ വി.വി ലതീഷ് ഇവരെ വിശദമായി ചോദ്യം ചെയ്തു വരികയാണ്.
സിവില്‍ പൊലിസ് ഓഫിസര്‍മാരായ എ ജയരാജന്‍, എസ് ഇബ്‌റാഹിം, മുത്തലിബ്, സജീവന്‍ എന്നിവര്‍ അന്വേഷണത്തില്‍ പങ്കെടുത്തു.