കോട്ടയം: പി.സി ജോര്‍ജ്ജ് ജയിച്ചാലും എല്‍.ഡി.എഫിനു വേണ്ടെന്ന് കണ്‍വീനര്‍ വൈക്കം വിശ്വന്‍. സ്വതന്ത്രനായി ജയിച്ചാല്‍ സ്വതന്ത്രനായി തുടര്‍ന്നാല്‍ മതി. പാര്‍ട്ടിക്കെതിരേ മത്സരിച്ചയാളെ കൂടെക്കൂട്ടില്ല. 100 സീറ്റുകള്‍ വരെ ലഭിക്കുമെന്നാണ് എല്‍.ഡി.എഫിന്റെ പ്രതീക്ഷയെന്നും അദ്ദേഹം പറഞ്ഞു. പാലായില്‍ കെ.എം.മാണി പരാജയപ്പെടും.
കാലങ്ങളായുള്ള മാണിയുടെ നിലപാടുകള്‍ അദ്ദേഹത്തിന് തിരിച്ചടിയാകും. പ്രതിപക്ഷ നേതാവ് വി.എസ് അച്യുതാനന്ദന്‍ പാര്‍ട്ടിയോട് ചേര്‍ന്നുനിന്നത് ഗുണകരമായി. പലതും ചെയ്യിക്കാന്‍ മാധ്യമങ്ങളടക്കം ശ്രമിച്ചെങ്കിലും വി.എസ് വിധേയനായില്ല.

മുഖ്യമന്ത്രി ആരാകണമെന്ന് ഫലം വന്നശേഷം പാര്‍ട്ടിയോഗം ചേര്‍ന്ന് തീരുമാനിക്കും. ആരുടെയൊക്കെ പേരുകള്‍ വന്നാലും പാര്‍ട്ടിതീരുമാനം അന്തിമമായിരിക്കും. മുന്നണി വിട്ടുപോയവര്‍ക്ക് തിരിച്ചുവരുന്നതില്‍ തടസമില്ല. ജനാധിപത്യ കേരള കോണ്‍ഗ്രസ് മത്സരിച്ച നാലു സീറ്റുകളിലും അവര്‍ വിജയിക്കുമെന്നാണ് കരുതുന്നത്. അവരെ സഹായിച്ചില്ലെന്ന് ആക്ഷേപമില്ലെന്നും വൈക്കം വിശ്വന്‍ വ്യക്തമാക്കി.