അടിമാലി: 17 മുതല്‍ 20 വരെ അടിമാലി വിശ്വദീപ്തി സി.എം.ഐ പബ്ലിക് സ്‌കൂളില്‍ നടക്കുന്ന സംസ്ഥാന സി.ബി.എസ്.ഇ സ്‌കൂള്‍ കലോത്സവത്തിനുള്ള ഒരുക്കങ്ങള്‍ പൂര്‍ത്തിയായതായി.
ആയിരത്തോളം അംഗീകൃത സ്‌കൂളുകളില്‍ നിന്നായി എണ്ണായിരത്തോളം വിദ്യാര്‍ഥികള്‍ പങ്കെടുക്കും. 22 വേദികളിലായാണ് മത്സരങ്ങള്‍ നടക്കുന്നത്. ചലച്ചിത്ര താരങ്ങളായ ബിന്ദു പണിക്കര്‍, ലക്ഷ്മി പ്രിയ, ജ്യുവല്‍ മേരി, അനുശ്രീ എന്നിവര്‍ വിവിധ ദിവസങ്ങളില്‍ അതിഥികളായി പങ്കെടുക്കും.
17ന് രാവിലെ ഒന്‍പതിന് മത്സരങ്ങള്‍ ആരംഭിക്കും. വൈകിട്ട് നാലിന് നടക്കുന്ന ഉദ്ഘാടന സമ്മേളനത്തില്‍ ഓള്‍ കേരള സി.ബി.എസ്.ഇ സ്‌കൂള്‍ മാനേജ്‌മെന്റ് അസോസിയേഷന്‍ സംസ്ഥാന പ്രസിഡന്റ് അഡ്വ. ടി.പി.എം. ഇബ്രാഹിംഖാന്‍ അധ്യക്ഷത വഹിക്കും.
എം.എല്‍.എമാരായ പി.ജെ ജോസഫ്, എസ് രാജേന്ദ്രന്‍, എം.എം മണി, റോഷി അഗസ്റ്റിന്‍, കോണ്‍ഫെഡറേഷന്‍ ഓഫ് കേരള സഹോദയ കോംപ്ലക്‌സസ് പ്രസിഡന്റ് കെ ഉണ്ണികൃഷ്ണന്‍ തുടങ്ങിയവര്‍ സംസാരിക്കുമെന്ന് കലോത്സവ കണ്‍വീനര്‍ ഫാദര്‍ ടോമി നമ്പ്യാപറമ്പില്‍, ഓള്‍ കേരള സി.ബി.എസ്.ഇ സ്‌കൂള്‍ മാനേജ്‌മെന്റ് അസോസിയേഷന്‍ സംസ്ഥാന പ്രസിഡന്റ് അഡ്വ. ടി.പി.എം ഇബ്രാഹിംഖാന്‍, കോണ്‍ഫെഡറേഷന്‍ ഓഫ് കേരള സഹോദയ കോംപ്ലക്‌സസ് സെക്രട്ടറി കെ.എ. ഫ്രാന്‍സിസ്, ഭാരവാഹികളായ ഡോ. ഇന്ദിര രാജന്‍, എബ്രഹാം തോമസ് എന്നിവര്‍ അറിയിച്ചു.