മനില:  ഫിലിപ്പൈന്‍സ് മുന്‍ സ്വേച്ഛാധിപതി ഫെര്‍ഡിനാന്റ് മാര്‍കോസിന്റെ മൃതദേഹം പൂര്‍ണ സൈനിക ബഹുമതികളോടെ സംസ്‌കരിച്ചു. മനിലയിലെ ഹീറോ സെമിത്തേരിയിലാണ് സംസ്‌കാരം നടന്നത്. 30 വര്‍ഷം മുമ്പ് ഹവായിലാണ് മാര്‍കോസ് അന്തരിച്ചത്. സംസ്‌കാര ചടങ്ങിന് ഹീറോ സെമിത്തേരി ഉപയോഗിക്കുന്നതിനെതിരേ പ്രതിപക്ഷവും മനുഷ്യാവകാശ സംഘടനകളും രംഗത്തുവന്നിരുന്നു. രാജ്യവ്യാപകമായി പ്രതിഷേധവും നടന്നു. ഫിലിപ്പൈന്‍സിലെ മുന്‍ പ്രസിഡന്റായിരുന്നു മാര്‍കോസ്. 21 ആചാരവെടിയോടെയാണ് സംസ്‌കാര ചടങ്ങുകള്‍ നടന്നത്. മാര്‍കോസിന്റെ മൃതദേഹവും രഹസ്യമായാണ് സംസ്‌കാര ചടങ്ങിനെത്തിച്ചത്. മാര്‍കോസ് മോഷ്ടാവാണെന്നാണ് പ്രതിഷേധക്കാര്‍ പറയുന്നത്. നിരവധി പേരെ കൊലപ്പെടുത്തിയാണ് അധികാരത്തിലേറിയതെന്നും മനുഷ്യാവകാശ സംഘടനകള്‍ പറയുന്നു.
മാര്‍ക്കോസിനെ സെമിത്തേരിയില്‍ അടക്കം ചെയ്യാമെന്ന് കഴിഞ്ഞ ആഴ്ച സുപ്രിംകോടതി ഉത്തരവിട്ടിരുന്നു. മുന്‍ പ്രസിഡന്റ് എന്ന നിലയിലാണിത്. ഈ പദവി വഹിച്ചതുകൊണ്ടാണ് സൈനിക ബഹുമതിയും ദേശീയ കലാകാരന്മാരെയും സര്‍ക്കാര്‍ സംസ്‌കാര ചടങ്ങുകള്‍ക്ക് ഉപയോഗിച്ചത്. മാര്‍ക്കോസിനെ ഹീറോ സെമിത്തേരിയില്‍ അടക്കം ചെയ്യുമെന്ന് പ്രസിഡന്റ് റോഡ്രിഗോ ഡൂട്രെറ്റ് തെരഞ്ഞെടുപ്പ് പ്രചാരണത്തിനിടെ വാഗ്്ദാനം നടത്തിയിരുന്നു.