ഹോങ്കോങ്: ഇന്ത്യയുടെ സൈന നേഹ്‌വാള്‍ ഹോങ്കോങ് ഓപണ്‍ സൂപ്പര്‍ സീരീസ് ബാഡ്മിന്റണ്‍ പോരാട്ടത്തിന്റെ ക്വാര്‍ട്ടറില്‍ പുറത്ത്. അതേസമയം മികച്ച ഫോമിലുള്ള മറ്റൊരു ഇന്ത്യന്‍ താരമായ പി.വി സിന്ധു സെമിയിലേക്ക് മുന്നേറി.
ആതിഥേയ താരമായ ചെങ് നാന്‍ യിയോടാണ് സൈന പരാജയമേറ്റു വാങ്ങിയത്. രണ്ടാം സെറ്റില്‍ തിരിച്ചു വരാന്‍ സൈനയ്ക്ക് സാധിച്ചെങ്കിലും അവസാന സെറ്റില്‍ 19-21 എന്ന സ്‌കോറിനു ഇന്ത്യന്‍ താരം പൊരുതി വീണു. സ്‌കോര്‍: 8-21, 21-18, 19-21.
ചൈന ഓപണ്‍ നേടി കരിയറിലെ ആദ്യ സൂപ്പര്‍ സീരീസ് കിരീടം സ്വന്തമാക്കി ഹോങ്കോങിലെത്തിയ സിന്ധു സിങ്കപൂര്‍ താരം സിയോവു ലിയാങിനെ പരാജയപ്പെടുത്തിയാണ് സെമിയിലേക്ക് മുന്നേറിയത്. സ്‌കോര്‍: 21-17, 21-23, 21-18. സെമിയില്‍ സൈനയെ ക്വാര്‍ട്ടറില്‍ കീഴടക്കിയ ചെങ് നാന്‍ യിയാണ് സിന്ധുവിന്റെ എതിരാളി.