മുക്കം: നാട്ടുകാരെ ഏറെനേരം ഭീതിയിലാഴ്ത്തിയ കാട്ടുപന്നി ഒടുവില്‍ ചത്തു. തോട്ടുമുക്കം മാടാമ്പി പ്രദേശത്താണ് ഇന്നലെ രാവിലെ ഒന്‍പതു മുതല്‍ നാട്ടുകാര്‍ക്കു ഭീഷണി ഉയര്‍ത്തി ജനവാസ കേന്ദ്രത്തില്‍ പന്നിയിറങ്ങിയത്. ഏറെ നേരം ഭീതി പരത്തിയ പന്നിയുടെ ആക്രമണത്തില്‍ പറമ്പില്‍ ജോലി ചെയ്തു കൊണ്ടിരിക്കുകയായിരുന കമ്പളത്ത് കണ്ടിയില്‍ നാരായണനു പരുക്കേറ്റു.
തുടര്‍ന്ന്, ഏതാനും സമയത്തിനകം പന്നി ചത്തുവീണു. പന്നിക്കു വെടിയേറ്റിരുന്നതായി സംശയമുണ്ട്. തേക്കിന്‍ചുവടു നിന്നു വനം വകുപ്പധികൃതര്‍ സ്ഥലത്തെത്തിയെങ്കിലും പോസ്റ്റ്‌മോര്‍ട്ടം ഉള്‍പ്പെടെയുളള നടപടികള്‍ ആവശ്യമായതിനാല്‍ താമരശ്ശേരിയില്‍ നിന്ന് ഫോറസ്റ്റ് അധികൃതരെത്തി പന്നിയുടെ ജഡം കൊണ്ടുപോയി.