തളിപ്പറമ്പ്: മികച്ച പ്രതിഭാശാലികളെ കണ്ടെത്താന്‍ തളിപ്പറമ്പ് സര്‍സയ്യിദ് കോളജ് ദിശ-ദി ലിറ്റില്‍ സ്‌കോളേഴ്‌സ് എന്ന പേരില്‍ സമഗ്ര വിദ്യാഭ്യാസ പദ്ധതി നടപ്പാക്കുന്നു. തളിപ്പറമ്പ് നഗരസഭാ പരിധിയിലെ ഏഴാംക്ലാസില്‍ പഠിക്കുന്ന മിടുക്കരായ കുട്ടികള്‍ക്ക് വേണ്ടിയാണ് പദ്ധതി. സര്‍ സയ്യിദ് കോളജ് സോഷ്യല്‍ സര്‍വിസ് വിങിന്റെ ആഭിമുഖ്യത്തില്‍ ആരംഭിക്കുന്ന പദ്ധതിയില്‍ ഈ വര്‍ഷം 60 കുട്ടികള്‍ക്കാണ് പ്രവേശനം. ഇവര്‍ക്ക് വിവിധ മേഖലകളില്‍ പരിശീലനം നല്‍കും. ശനിയാഴ്ചകളിലും അവധിദിവസങ്ങളിലുമാണ് പരിശീലനം. ഈ മാസം മുതല്‍ മെയ് അവസാനം വരെയാണ് പദ്ധതി കാലയളവ്. പൂര്‍ണമായും സൗജന്യമാണ്. ജനുവരി മൂന്നിന് ഉച്ചക്ക് ഒന്നിന് കോളജില്‍ പ്രതിഭാ നിര്‍ണയ പരീക്ഷ നടത്തും. കുട്ടികള്‍ സ്‌കൂളില്‍ നിന്നുള്ള സാക്ഷ്യപത്രവുമായി രക്ഷിതാക്കളോടൊപ്പം എത്തിച്ചേരണം. പദ്ധതിയുടെ ഉദ്ഘാടനം ആറിന് രാവിലെ 10ന് കോളജില്‍ വിദ്യാഭ്യാസ മന്ത്രി സി രവീന്ദ്രനാഥ് നിര്‍വഹിക്കും. ഫോണ്‍ 9947098721. വാര്‍ത്താസമ്മേളനത്തില്‍ കോളജ് പ്രിന്‍സിപ്പല്‍ ഡോ. പി.ടി അബ്ദുല്‍ അസീസ്, കോഓര്‍ഡിനേറ്റര്‍ ഡോ. ടി.പി നഫീസാ ബേബി സംബന്ധിച്ചു.