മഞ്ചേശ്വരം: വാമഞ്ചൂര്‍ എക്‌സൈസ് ചെക്ക് പോസ്റ്റില്‍ എക്‌സൈസ് സംഘം നടത്തിയ പരിശോധനയില്‍ 20 ലക്ഷത്തിന്റെ കുഴല്‍പ്പണം പിടികൂടി. നിരോധിച്ച 500 രൂപയുടെ 20 ലക്ഷം രൂപയ്ക്കുള്ള നോട്ടുകളാണ് പിടികൂടിയത്. സംഭവവുമായി ബന്ധപ്പെട്ട് മൊഗ്രാല്‍പുത്തൂര്‍ ചൗക്കി സ്വദേശി അബ്ദുല്‍ ഗഫൂറി(42)നെ എക്‌സൈസ് അധികൃതര്‍ അറസ്റ്റു ചെയ്തു. ഇന്നലെ ഉച്ചയ്ക്ക് 12 മണിയോടെ മംഗളൂരുവില്‍നിന്നും കാസര്‍കോട്ടേക്ക് വരികയായിരുന്ന കര്‍ണാടക ആര്‍.ടി.സി ബസില്‍ യാത്രക്കാരനായ ഗഫൂറിന്റെ ബാഗ് പരിശോധിച്ചപ്പോഴാണ് പണം കണ്ടെത്തിയത്. എക്‌സൈസ് സംഘത്തിന് കിട്ടിയ രഹസ്യ വിവരത്തിന്റെ അടിസ്ഥാനത്തില്‍ കഴിഞ്ഞ ദിവസം രാത്രി മുതല്‍ ചെക്ക് പോസ്റ്റില്‍ പരിശോധന നടത്തി വരികയായിരുന്നു.
പ്രതിയെ മഞ്ചേശ്വരം പൊലിസിന് കൈമാറി. എക്‌സൈസ് സി.ഐ ഹരിദാസ്, ഇന്‍സ്‌പെക്ടര്‍മാരായ ടോണി എസ്. ഐസക്, ചന്തുക്കുട്ടി നായര്‍, പ്രിവന്റീവ് ഓഫിസര്‍ വി. വി സന്തോഷ് കുമാര്‍, സിവില്‍ എക്‌സൈസ് ഓഫിസര്‍മാരായ പ്രദീപ്, ഹമീദ് തുടങ്ങിയവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.