ജക്കാര്‍ത്ത: ഇന്തോനേഷ്യന്‍ വിമാനം ദക്ഷിണ സിംഗപ്പൂരിലെ ബതം ദ്വീപിന് സമീപം കാണാതായി. 15 യാത്രക്കാരാണ് വിമാനത്തിലുണ്ടായിരുന്നത്. ബാംഗ്ക ദ്വീപില്‍ നിന്ന് ടേക്ക് ഓഫ് ചെയ്ത വിമാനം സിംഗപ്പൂരിലെ ബതം ദ്വീപിനിടയിലുള്ള മെന്‍സാനാക്, സെബാന്‍ക, ജെന്‍ദാര്‍ ദ്വീപുകളിലെവിടെയങ്കിലും തകര്‍ന്നുവീണിട്ടുണ്ടാവുമെന്നാണ് നിഗമനം. അപകടത്തില്‍ ആരും രക്ഷപ്പെടാന്‍ സാധ്യതയില്ലെന്നാണ് രക്ഷാപ്രവര്‍ത്തകര്‍ പറയുന്നത്.
തകര്‍ന്നുവീണ വിമാനത്തിന്റെ അവശിഷ്ടങ്ങള്‍ രക്ഷാപ്രവര്‍ത്തക സംഘം കണ്ടെത്തിയിട്ടുണ്ട്. ഇന്തോനേഷ്യന്‍ നാവികസേന മൂന്നു കപ്പലുകളെയും രണ്ടു നിരീക്ഷണ ബോട്ടുകളെയും രക്ഷാപ്രവര്‍ത്തനത്തിന് അയച്ചു. വിമാനത്തിന്റെ അവശിഷ്ടങ്ങള്‍ റിയാവു ദ്വീപിലെ മത്സ്യത്തൊഴിലാളികളാണ് കണ്ടെത്തിയത്. മൃതദേഹങ്ങള്‍ കണ്ടെത്തിയെന്നും റിപ്പോര്‍ട്ടുണ്ട്. അതേസമയം, ഇന്തോനേഷ്യന്‍ സേനയ്‌ക്കൊപ്പം സിംഗപ്പൂരും രക്ഷാപ്രവര്‍ത്തനത്തില്‍ പങ്കെടുക്കുന്നുണ്ട്.
ബതം-പംഗ്കല്‍ പിനാങ് ദ്വീപുകള്‍ക്ക് ഇടയില്‍ വച്ച് വിമാനം റഡാറില്‍ നിന്ന് അപ്രത്യക്ഷമാകുകയായിരുന്നു. അതിനാല്‍ കൂടുതല്‍ കാര്യങ്ങള്‍ അന്വേഷണത്തിലൂടെ മാത്രമേ കണ്ടെത്താന്‍ സാധിക്കൂവെന്ന് പിനാങ് വ്യോമസേനാ കമാന്‍ഡര്‍ എസ്. ഇരൗവന്‍ പറഞ്ഞു. അതേസമയം, യാത്രക്കാരുടേതെന്ന് കരുതുന്ന വസ്തുക്കള്‍ കണ്ടെടുത്തതായി ഇന്തോനേഷ്യന്‍ രക്ഷാപ്രവര്‍ത്തന ഏജന്‍സിയായ ബസാര്‍നസിന്റെ അധ്യക്ഷന്‍ ബാംബാങ് സോലിസ്‌ത്യോ വ്യക്തമാക്കി.
വിമാനം തകര്‍ന്ന സ്ഥലത്തുനിന്ന് സ്‌ഫോടനത്തിന് സമാനമായ ശബ്ദം കേട്ടതായി പ്രദേശവാസികള്‍ വ്യക്തമാക്കി. താന്‍ജുങ് പിനാങിന്റെ 40 നോട്ടിക്കല്‍ മൈലിനുള്ളിലെ റഡാര്‍ ദൃശ്യങ്ങളാണ് നിലവില്‍ രക്ഷാപ്രവര്‍ത്തകര്‍ക്ക് ലഭിച്ചത്. വിമാനമിറങ്ങാന്‍ ഏതാനും നിമിഷങ്ങള്‍ മാത്രം ശേഷിക്കെയാണ് അപകടം നടന്നതെന്നാണ് ദൗത്യസേനയുടെ നിഗമനം. സിംഗപ്പൂര്‍ സമയം രാവിലെ 10.24നാണ് വിമാനം ടേക്ക് ഓഫ് ചെയ്തത്. 11.58നാണ് ബതമില്‍ വിമാനമെത്തേണ്ടിയിരുന്നത്.