കട്ടപ്പന: കമ്പംമേട്ടില്‍ കഞ്ചാവുമായി അഞ്ച് യുവാക്കള്‍  പൊലിസിന്റെ വലയിലായി. വാഹനപരിശോധനക്കിടെയാണ് പ്രതികള്‍ പിടിയിലായത്.
 പ്രതികളില്‍ നാലുപേരും എറണാകുളം സ്വദേശികളാണ്. വടക്കേക്കര മുനമ്പം പാണ്ടിച്ചേരി വീട്ടില്‍ മിഥുന്‍(22),ഞാറക്കല്‍ സ്വദേശികളായ കോട്ടക്കല്‍ അന്‍ഷോ(25),നികത്തിത്തറ വീട്ടില്‍ ശങ്കര്‍(21), മാളിയാകം വീട്ടില്‍ അരവിന്ദ്(19), തൃശൂര്‍ കൊടുങ്ങല്ലൂര്‍ പാലക്കാപറമ്പില്‍ ജിഷ്ണു(21) എന്നിവരാണ്  പിടിയിലായത്.
  ഇന്നലെ ഉച്ചയ്ക്ക്  12.30ഓടെയാണ് സംഭവം. ഇവര്‍ സഞ്ചരിച്ചിരുന്ന സാന്‍ട്രോ കാറിന്റെ ഡോറിന്റെ ഇന്നര്‍കവറിംഗില്‍ ഒളിപ്പിച്ച നിലയില്‍ 650 ഗ്രാം കഞ്ചാവാണ് പിടികൂടിയത്. തമിഴ്‌നാട്ടിലെ കമ്പത്ത് നിന്ന് 5000 രൂപ നല്‍കിയാണ് പ്രതികള്‍ കഞ്ചാവ് വാങ്ങിയത്. വിതരണം നടത്തുന്നതിനായിട്ടാണ് കഞ്ചാവ് വാങ്ങിയതെന്നാണ് ഇവര്‍ പൊലിസിന് നല്‍കിയ മൊഴി. മേല്‍നടപടികള്‍ക്കുശേഷം പ്രതികളെ ഇന്ന് കോടതിയില്‍ ഹാജരാക്കുമെന്ന് കമ്പംമേട്ട് പൊലിസ് അറിയിച്ചു.