തരുവണ: കഴിഞ്ഞ മൂന്ന് ദിവസമായി ഗവ.ഹയര്‍ സെക്കന്‍ഡറി സ്‌കൂളില്‍ നടന്നു വന്ന മാനന്തവാടി ഉപജില്ലാ സ്‌കൂള്‍ കലോത്സവം സമാപിച്ചു. 41 ഇനങ്ങളില്‍ എ ഗ്രേഡോടെ വിജയിച്ച മാനന്തവാടി ഗവ.വൊക്കേഷനല്‍ ഹയര്‍ സെക്കന്‍ഡറി സ്‌കൂളിനാണ് ഹയര്‍ സെക്കന്‍ഡറി വിഭാഗം ഓവറോള്‍ ചാംപ്യന്‍ പട്ടം.
ദ്വാരക സേക്രട്ട് ഹാര്‍ട്ട് ഹയര്‍ സെക്കന്‍ഡറി സ്‌കൂളാണ് രണ്ടാം സ്ഥാനത്ത്. ഹൈസ്‌കൂള്‍ വിഭാഗത്തില്‍ മാനന്തവാടി എം.ജി.എം ഹയര്‍ സെക്കന്‍ഡറി സ്‌കൂള്‍ ഒന്നും മനന്തവാടി വൊക്കേഷനല്‍ ഹയര്‍ സെക്കന്‍ഡറി രണ്ടാം സ്ഥാനവും കരസ്ഥമാക്കി. യു.പി വിഭാഗത്തില്‍ കല്ലോടി സെന്റ് ജോസഫ് യു.പി സ്‌കൂളിനാണ് ഒന്നാം സ്ഥാനം. മാനന്തവാടി ലിറ്റില്‍ ഫ്‌ളവര്‍ യു.പി സ്‌കൂള്‍ രണ്ടാം സ്ഥാനവും കരസ്ഥമാക്കി. എല്‍.പി വിഭാഗത്തില്‍ എല്‍.എഫ്.യു.പി സ്‌കൂള്‍, കല്ലോടി സെന്റ് ജോസഫ്‌സ് യു.പി സ്‌കൂളുകള്‍ യഥാക്രമം ഒന്നും രണ്ടും സ്ഥാനക്കാരായി.
അറബിക് സാഹിത്യോത്സവത്തില്‍ പനമരം ക്രസന്റ് ഹൈസ്‌കൂള്‍, വെള്ളമുണ്ട ഗവ.യു.പി സ്‌കൂള്‍, കല്ലോടി സെന്റ് ജോസഫ്‌സ് സ്‌കൂള്‍ എന്നിവരാണ് യഥാക്രമം ഹൈസ്‌കൂള്‍, യു.പി, എല്‍.പി വിഭാഗങ്ങളില്‍ ജേതാക്കളായത്. സംസ്‌കൃതോത്സവത്തില്‍ കണിയാരം ഫാദര്‍ ജി.കെ.എം ഹൈസ്‌കൂള്‍, പയ്യമ്പള്ളി സെന്റ് കാതറിന്‍സ് ഹയര്‍ സെക്കന്‍ഡറി സ്‌കൂള്‍ എന്നിവര്‍ ഓവറോള്‍ കിരീടം നേടി.സമാപന സമ്മേളനത്തില്‍ ബ്ലോക്ക് പഞ്ചായത്ത് പ്രസിഡന്റ് പ്രീതാരാമന്‍ അധ്യക്ഷയായി. ജില്ലാപഞ്ചായത്ത് പ്രസിഡന്റ് ടി ഉഷാകുമാരി ഉദ്ഘാടനം ചെയ്തു. വെള്ളമുണ്ട പഞ്ചായത്ത് വൈസ് പ്രസിഡന്റ് ആന്‍ഡ്രൂസ് ജോസഫ്, ഖമര്‍ ലൈല, ഇ സിദ്ദീഖ്, കാഞ്ഞായി ഇബ്രാഹിം, കുഞ്ഞിരാമന്‍, എ ഇ.ഒ രമേശ് കെ, കെ.കെ അബ്ദുല്ല, കെ.സി ആലി, എം മമ്മു മാസ്റ്റര്‍ തുടങ്ങിയവര്‍ സംസാരിച്ചു.