ലോസ് ആഞ്ചലസ്: ഇന്ത്യന്‍ സംഗീത കുലപതി എ.ആര്‍ റഹ്മാന്‍ വീണ്ടും ഓസ്‌കാര്‍ പരിഗണനാ പട്ടികയില്‍. ബ്രസീല്‍ ഫുട്‌ബോള്‍ ഇതിഹാസം പെലെയുടെ ജീവിതത്തെ ആസ്പദമാക്കി നിര്‍മിക്കുന്ന ചിത്രത്തിന് നല്‍കിയ സംഗീത സംവിധാനത്തിനാണ് റഹ്മാന്‍ ഇത്തവണ പട്ടികയിലിടം നേടിയത്. കായികം പശ്ചാതലമാക്കിയുള്ള 2016ലെ സിനിമയ്ക്കുള്ള പ്രഥമ ഓസ്‌കാര്‍ പരിഗണന പട്ടികയിലാണ് റഹ്മാന്‍ ഇടം നേടിയത്. ഈ സിനിമയില്‍ ബ്രസീലിയന്‍ സംഗീത താളങ്ങള്‍ കൂട്ടിച്ചേര്‍ത്താണ് റഹ്മാന്‍ സംഗീതമൊരുക്കിയത്.
2009ല്‍ സ്ലം ഡോഗ് മില്ല്യനയര്‍ എന്ന ഇന്ത്യന്‍ ചിത്രത്തിന് സംഗീതമൊരുക്കിയതിന് റഹ്മാനെ തേടി ഓസ്‌കാര്‍ പുരസ്‌കാരമെത്തിയിരുന്നു. 2017 ജനുവരി 24നാണ് ഓസ്‌കര്‍ അവാര്‍ഡുകള്‍ പ്രഖ്യാപിക്കുക. പെലെ: ഒരു ഇതിഹാസത്തിന്റെ പിറവി എന്നാണ് ചിത്രത്തിന്റെ പേര്.