ഇരിട്ടി: ആറളം ഫാം ആദിവാസി കുടുംബങ്ങള്‍ക്ക് താത്കാലികമായി നല്‍കിയ കാര്‍ഡുകള്‍ വഴിയുള്ള റേഷന്‍ വിതരണം നിര്‍ത്തിവച്ചതിനെ തുടര്‍ന്ന് ആദിവാസി കുടുംബങ്ങള്‍ ആറളം പഞ്ചായത്ത് വൈസ് പ്രസിഡന്റ് കെ വേലായുധന്റെ നേതൃത്വത്തില്‍ ഇരിട്ടി താലൂക്ക് അസി. സപ്ലൈ ഓഫിസറെ ഉപരോധിച്ചു. ഒരു മാസമായി റേഷന്‍ ലഭിക്കാത്ത പുനരധിവാസ മേഖലയിലെ 149 കുടുംബങ്ങളിലെ അംഗങ്ങളാണ് അസി. സപ്ലൈ ഓഫിസര്‍ എം പ്രജുളയെ ഉപരോധിച്ചത്. റേഷന്‍ കാര്‍ഡ് ലഭിച്ച 477 കുടുംബങ്ങളില്‍ 149 കുടുംബങ്ങള്‍ക്ക് താത്കാലിക കാര്‍ഡ് നല്‍കിയായിരുന്നു റേഷന്‍ നല്‍കിയിരുന്നത്. ഒരു മാസത്തിലധികമായി ഇവര്‍ക്ക് റേഷന്‍ തടഞ്ഞുവയ്ക്കുകയും റേഷനും മാവേലി സ്റ്റോറില്‍ നിന്നു പലവ്യഞ്ജനങ്ങളും ലഭിക്കാത്ത അവസ്ഥയുമാണ് ഇപ്പോള്‍. ഇതിനു പരിഹാരം കാണണമെന്നാവശ്യപ്പെട്ടായിരുന്നു ഉപരോധം. ജില്ലാ സപ്ലൈ ഓഫിസറുമായും കലക്ടറുമായും അസി. സപ്ലൈ ഓഫിസര്‍ ഫോണില്‍ ബന്ധപ്പട്ടു. താത്കാലികമായി റേഷന്‍ നല്‍കാനും ഒരാഴ്ചയ്ക്കുള്ളില്‍ പരിഹാരം കാണാനും തീരുമാനിച്ചതായി കലക്ടര്‍ അറിയിച്ചതിനെ തുടര്‍ന്ന് ഉപരോധം പിന്‍വലിക്കുകയായിരുന്നു. ഉപരോധത്തില്‍ മെമ്പര്‍ പി.കെ കരുണാകരന്‍, പി.ആര്‍ പ്രസാദ്, രാധാ കോടി, വിനോദ് നേതൃത്വം നല്‍കി.