കൊട്ടാരക്കര: പെരുങ്കുളം പി.വി ഹയര്‍സെക്കന്‍ഡറി സ്‌കൂളില്‍ കലോത്സവവുമായി ബന്ധപ്പെട്ട് അനധികൃത പണപ്പിരിവ് നടക്കുന്നതായി പള്ളിക്കല്‍ അല്‍ഫാസ് കോട്ടേജില്‍ ഷെമീന ഷംസുദ്ദീന്റെ പരാതി. ഇതുസംബന്ധിച്ച പരാതി വിദ്യാഭ്യാസ മന്ത്രിക്ക് നല്‍കിയതായി അവര്‍ പറഞ്ഞു. ഉപജില്ലാ കലോത്സവമായി ബന്ധപ്പെട്ട് ഓരോ വിദ്യാര്‍ഥികളില്‍ നിന്നും 100 രുപവീതം പിരിച്ചതായും ഒന്ന് മുതല്‍ എട്ടു വരെ ക്ലാസുകളിലെ കുട്ടികളില്‍ നിന്നും സംഭാവന പിരിക്കരുതെന്ന നിര്‍ദേശം മറികടന്ന് പിരിവ് നടത്തിയതായും ഷെമീന പറഞ്ഞു.
പി.ടി.എ കൂടി പ്രസിഡന്റിനെ തെരഞ്ഞെടുക്കാതെ 7 വര്‍ഷമായി ഒരാളെത്തന്നെ പി.ടി.എ പ്രസിഡന്റായി നിലനിര്‍ത്തുകയാണിവിടെ. പി.ടി.എ പ്രസിഡന്റിന്റെ മക്കള്‍ ഈ സ്‌കൂളില്‍ പഠിക്കുന്നില്ലെന്നും അവര്‍ ആരോപിച്ചു. വിദ്യാഭ്യാസ മന്ത്രിക്കും വകുപ്പ് അധികൃതര്‍ക്കും നല്‍കിയ പരാതികളില്‍ ഉചിത നടപടികള്‍ ഉണ്ടായില്ലെങ്കില്‍ നിയമ നടപടികള്‍ സ്വീകരിക്കുമെന്നും ഷമീന ഷംസുദ്ദീന്‍ പറഞ്ഞു.