കഴക്കൂട്ടം: കേരള സൈക്ലിങ് അസോസിയേഷന്‍ സംഘടിപ്പിക്കുന്ന ദേശീയ ട്രാക്ക് സൈക്ലിങ് ചാംപ്യന്‍ഷിപ്പ് കാര്യവട്ടം എല്‍.എന്‍.സി.പി വെലോഡ്രോമില്‍ ആരംഭിച്ചു.
ആദ്യദിവസം എട്ടിനങ്ങളിലെ മല്‍സരങ്ങള്‍ പൂര്‍ത്തിയായപ്പോള്‍ 23 പോയിന്റുമായി കേരളം മുന്നിലാണ്. 22 പോയിന്റുമായി മണിപ്പൂര്‍ തൊട്ടുപിന്നിലുണ്ട്. ഏഴു പോയിന്റ് നേടിയ എ ആന്‍ഡ് എമ്മാണ് മൂന്നാം സ്ഥാനത്ത്. 24 സംസ്ഥാനങ്ങളില്‍ നിന്നുള്ള 500ല്‍പരം കായികതാരങ്ങള്‍ മല്‍സരങ്ങളില്‍ പങ്കെടുക്കുന്നുണ്ട്. വിവിധ കാറ്റഗറികളിലായി നാല്‍പതിലേറെ മല്‍സരങ്ങളാണ് അരങ്ങേറുന്നത്. സാഫ് ഗെയിംസ്, കോമണ്‍വെല്‍ത്ത് ഗെയിംസ്, ഏഷ്യന്‍ ഗെയിംസ് തുടങ്ങിയവയില്‍ പങ്കെടുക്കുകയും മെഡലുകള്‍ നേടുകയും ചെയ്തിട്ടുള്ളവരാണ് മത്സരിക്കുന്നവരിലേറെയും. രാവിലെ തിരുവനന്തപുരം മേയര്‍ അഡ്വ. വി.കെ.പ്രശാന്ത് ഉദ്ഘാടനം ചെയ്തു. കേരള സൈക്ലിങ് അസോസിയേഷന്‍ പ്രസിഡന്റ് അഡ്വ. വി.കെ.ഹരികുമാര്‍ അധ്യക്ഷനായി. സീനിയര്‍ വിഭാഗത്തില്‍ 69ാമത്തേയും ജൂനിയര്‍ വിഭാഗത്തില്‍ 46ാമത്തേയും സബ് ജൂനിയര്‍ വിഭാഗത്തില്‍ 32ാമത്തേയും ചാംപ്യന്‍ഷിപ്പാണിത്. കേരളത്തില്‍ സൈക്ലിംഗ് മല്‍സരങ്ങള്‍ക്ക് അനുയോജ്യമായ ഏക വെലോഡ്രോമാണ് കാര്യവട്ടത്തേത്. 25ന് സമാപിക്കും.