വടക്കാഞ്ചേരി : പീഡനക്കേസിലെ ഇര അന്വേഷണ സംഘത്തിനെതിരേ വടക്കാഞ്ചേരി മജിസ്‌ട്രേറ്റ് കോടതിയില്‍ സമര്‍പ്പിച്ച ഹരജി കോടതി തള്ളി. അന്വേഷണത്തിന്റെ പേരില്‍ ചോദ്യം ചെയ്യാന്‍ വിളിച്ചുവരുത്തി മാനസികമായി പീഡിപ്പിക്കുകയാണെന്ന് ചൂണ്ടിക്കാട്ടിയാണ് യുവതി 17ന് കോടതിയെ സമീപിച്ചത്. അന്വേഷണം പുരോഗമിക്കുന്ന ഈ ഘട്ടത്തില്‍ കേസില്‍ ഇടപെടാനാവില്ലെന്ന് വാദത്തിനിടയില്‍ കോടതി വ്യക്തമാക്കി.
അന്വേഷണ സംഘം കൃത്യമായ റിപ്പോര്‍ട്ട് കോടതിയില്‍ സമര്‍പ്പിക്കുന്നുണ്ട്. പരാതിക്കാരിക്ക് വേണമെങ്കില്‍  സ്വകാര്യ അന്യായം സമര്‍പ്പിക്കാമെന്നും മജിസ്‌ട്രേറ്റ് കെ.എം ശ്രീദേവി പറഞ്ഞു. അസിസ്റ്റന്റ് പബ്ലിക് പ്രോസിക്യൂട്ടര്‍ കൂടുതല്‍ സമയം ആവശ്യപ്പെട്ടതിനെതുടര്‍ന്നാണ് ഹരജി ഇന്നലെ പരിഗണിച്ചത്.