വൈക്കം: കഞ്ചാവ് വില്‍പ്പന നടത്തിവന്ന മൂന്നു പേരെ എക്‌സൈസ് പിടികൂടി. വൈക്കം എക്‌സൈസ് റെയ്ഞ്ച് ഇന്‍സ്‌പെക്ടര്‍ എസ്.എസ് ബാബുവിന്റെ നേതൃത്വത്തിലുള്ള സംഘമാണ് പിടികൂടിയത്. ഉദയനാപുരം സ്വദേശി ആദര്‍ശ് ജമനീന്ദ്രന്‍, പൂഴിക്കോലുകാരായ മഹേഷ് തങ്കച്ചന്‍, സലിത് മാത്യു എന്നിവരാണ് പിടിയിലായത്.
വൈക്കം ബീച്ച്, പാലാംകടവ്, മണകുന്നം പ്രദേശങ്ങള്‍ കേന്ദ്രീകരിച്ചായിരുന്നു ഇവരുടെ കച്ചവടം. ഇവരില്‍നിന്നും 11 പൊതി കഞ്ചാവും ഒരു മോട്ടോര്‍ ബൈക്കും പിടിച്ചെടുത്തു. ബീച്ച് ഉള്‍പ്പെടെയുള്ള പ്രദേശങ്ങളില്‍ തമ്പടിച്ചിരുന്ന സ്‌ക്കൂള്‍-കോളജ് വിദ്യാര്‍ഥികള്‍ ഉള്‍പ്പെടെയുള്ളവര്‍ക്ക് മൊബൈല്‍ ഫോണിലൂടെ സന്ദേശങ്ങള്‍ കൈമാറിയാണ് കഞ്ചാവ് വില്‍പന നടത്തിയിരുന്നത്.
മണകുന്നം വാക്കയില്‍ ക്ഷേത്രപരിസരത്ത് വാഹനപരിശോധന നടത്തവേ നിര്‍ത്താതെ പോയ വാഹനം പിന്‍തുടര്‍ന്നാണ് പ്രതികളെ പിടികൂടിയത്.
ക്രിസ്മസ്-പുതുവത്സരം പ്രമാണിച്ച് മയക്കുമരുന്ന് ഉപയോഗത്തിനെതിരെ എക്‌സൈസ് സംഘം പരിശോധന കര്‍ശനമാക്കിയിരുന്നു. തുടര്‍ന്നും പരിശോധനകള്‍ ശക്തമായി തുടരുമെന്ന് എക്‌സൈസ് ഇന്‍സ്‌പെക്ടര്‍ അറിയിച്ചു. അസി. എക്‌സൈസ് ഇന്‍സ്‌പെക്ടര്‍ കെ.പി ജയലാല്‍, സിവില്‍ എക്‌സൈസ് ഓഫീസര്‍മരായ സി.ജി ജ്യോതി, അജയകുമാര്‍, കെ.ജെ റാഫേല്‍, വി.എസ് കണ്‍മണികുട്ടന്‍, കെ.എം അഭിലാഷ്, വി.എസ് മണിക്കുട്ടന്‍, എ.പി ബാലചന്ദ്രന്‍ എന്നിവരും പരിശോധനയില്‍ പങ്കെടുത്തു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.