എഡിന്‍ബര്‍ഗ്: ഹോസു പ്രിറ്റോയ്ക്കും ഗ്രഹാം സ്റ്റാക്കിനും പിന്നാലെ  മാര്‍ക്വി താരം ആരോണ്‍ ഹ്യൂസും കേരള ബ്ലാസ്റ്റേഴ്‌സ് വിട്ടു. സ്‌കോട്ടിഷ് ക്ലബ് ഹേര്‍ത്ത് ഓഫ് മിഡിലോട്ടിയന്‍ എഫ്.സിയാണ് ഹ്യൂസിനെ സ്വന്തമാക്കിയത്.
നേരത്തെ തന്നെ ഹേര്‍ത്ത് പരിശീലകന്‍ ഇയാന്‍ കാത്ത്‌റോ ഹ്യൂസിനെ അവരുടെ ടീമിലെത്തിക്കുമെന്ന് പ്രഖ്യാപിച്ചിരുന്നു. എന്നാല്‍ ആറ് മാസത്തേക്ക് മാത്രമാണ് ഹ്യൂസ് എഡിന്‍ബര്‍ഗിലെ ഈ ക്ലബുമായി കരാറിലേര്‍പ്പെട്ടിരിക്കുന്നത് എന്നത് ബ്ലാസ്റ്റേഴ്‌സ് ആരാധകര്‍ക്ക് ആശ്വാസമാണ്. എഡിന്‍ബര്‍ഗിലേക്കുളള വരവ് ഹ്യൂസ് പ്രതീക്ഷയോടെയാണ് കാണുന്നത്. തന്റെ ദേശീയ ടീമായ ഉത്തര അയര്‍ലന്‍ഡ് ടീമില്‍ തുടരുന്നതിന് ഇത് ഏറെ സഹായിക്കുമെന്നാണ് ഹ്യൂസിന്റെ പ്രതീക്ഷ. താന്‍ പൂര്‍ണ്ണ ഫിറ്റാണെന്നും തനിക്ക് ഏത് സാഹചര്യത്തിലും കളിക്കാനാകുമെന്നും ഹ്യൂസ് പറയുന്നു.