തിരുവനന്തപുരം: രാജ്യാന്തര വിമാനത്താവളത്തില്‍ യാത്രക്കാരുടെ ബാഗേജുകള്‍ തുറന്ന് സ്വര്‍ണവും പണവും ഉള്‍പ്പെടെയുള്ള സാധനങ്ങള്‍ മോഷ്ടിക്കുന്ന രണ്ടുപേരെ പൊലിസ് പിടികൂടി. വിമാനത്താവളത്തില്‍ ലോഡിങ് തൊഴിലാളികളായ ശംഖുംമുഖം സുലൈമാന്‍ സ്ട്രീറ്റില്‍ എ. സമീര്‍, വെട്ടുകാട് രാജീവ് നഗറില്‍ ടോം ഫെര്‍ണാണ്ടസ് എന്നിവരരെയാണ് വലിയതുറ പൊലിസ് പിടികൂടിയത്.
കഴിഞ്ഞ ഡിസംബര്‍ 17ന് കന്യാകുമാരി സ്വദേശിയായ യാത്രക്കാരന്റെ ബാഗില്‍നിന്നു 17ഗ്രാം തൂക്കമുള്ള സ്വര്‍ണവളയും മൊബൈല്‍ ഫോണും മോഷ്ടിച്ച കുറ്റത്തിനാണ് ഇവരെ പിടികൂടിയത്. വിമാനക്കമ്പനി അധികൃതര്‍ പൊലിസില്‍ പരാതിപ്പെട്ടതിനെ തുടര്‍ന്ന് നടത്തിയ അനേഷണത്തിലാണ് മോഷ്ടാക്കള്‍ പിടിയിലായത്.
എയര്‍പോര്‍ട്ടിലെത്തുന്ന ബാഗേജുകള്‍ ക്ലിയറന്‍സ് വിഭാഗത്തിലേക്കും, പിന്നീട് വിമാനത്തിലേക്കും മാറ്റുന്ന ജോലികളില്‍ ഏര്‍പ്പെടുന്നവരാണ് രണ്ടുപേരും. ഭദ്രമാക്കി പൂട്ടിയ ബാഗേജുകളില്‍ നിന്നടക്കം വര്‍ഷങ്ങളായി ഇവര്‍ സാധനങ്ങള്‍ മോഷ്ടിച്ചു വരികയായിരുന്നു. എയര്‍പോര്‍ട്ടിലെ ലോഡിങ് തൊഴിലാളികളായ ചിലര്‍ക്കും എയര്‍പോര്‍ട്ട് ജീവനക്കാര്‍ക്കും സംഭവവുമായി ബന്ധമുണ്ടെന്ന് അന്വേഷണത്തില്‍ കണ്ടെത്തി. മോഷ്ടിച്ച സ്വര്‍ണവളയും മൊബൈല്‍ഫോണും ഇവരുടെ വീടുകളില്‍ പൊലിസ് കണ്ടെടുത്തു.