കോഴിക്കോട്: പാമ്പാടി നെഹ്‌റു എന്‍ജിനീയറിങ് കോളജിലെ വിദ്യാര്‍ഥി വിഷ്ണുവിന്റെ മരണത്തിനിടയാക്കിയവര്‍ക്കെതിരേയും കോളജിനെതിരേയും നടപടി സ്വീകരിക്കണമെന്നാവശ്യപ്പെട്ട് 19ന് സെക്രട്ടറിയേറ്റ് മാര്‍ച്ച് നടത്തുമെന്ന്  എം.എസ്.എഫ് നേതാക്കള്‍ വാര്‍ത്താസമ്മേളനത്തില്‍ പറഞ്ഞു. വിദ്യാര്‍ഥികള്‍ നേരിടുന്ന പ്രശ്‌നങ്ങളെക്കുറിച്ച് പഠിക്കാനും നടപടി സ്വീകരിക്കാനും വിദ്യാര്‍ഥി പ്രതിനിധികളെ ഉള്‍പ്പെടുത്തി പ്രത്യേക കമ്മിഷന്‍ രൂപീകരിക്കണമെന്നും എം.എസ്.എഫ് ആവശ്യപ്പെട്ടു.
പാതിവഴിയില്‍ പഠനം ഉപേക്ഷിച്ച് സര്‍ട്ടിഫിക്കറ്റ് ലഭിക്കാത്ത വിദ്യാര്‍ഥികളെ പങ്കെടുപ്പിച്ച് സംസ്ഥാന വ്യാപകമായി പ്രക്ഷോഭത്തിന് നേതൃത്വം നല്‍കും. ഇതിനായി 9746211353, 9746343434 എന്നീ ഹെല്‍പ്പ് ലൈന്‍ നമ്പറുകളില്‍ ബന്ധപ്പെടാമെന്നും വാര്‍ത്താസമ്മേളനത്തില്‍ സംസ്ഥാന പ്രസിഡന്റ് മിസ്ഹബ് കീഴരിയൂര്‍, ജനറല്‍ സെക്രട്ടറി എം.പി നവാസ്, ട്രഷറര്‍ നിഷാദ് കെ.സലിം എന്നിവര്‍ പറഞ്ഞു.