കൊച്ചി: 700 ഗ്രാം കഞ്ചാവും വലിക്കാന്‍ ഉപയോഗിക്കുന്ന ഉപകരണവുമായി എട്ടു യുവാക്കള്‍ പൊലിസ് പിടിയിലായി. സൗത്ത് റെയില്‍വെ സ്റ്റേഷനു സമീപത്തുള്ള ഹോട്ടലില്‍ മുറി എടുത്തു കഞ്ചാവ് വില്‍പ്പന നടത്തിയിരുന്ന എറണാകുളം സ്വദേശികളായ ടെഡി(20), ബെഡ്‌സണ്‍(20), എബിന്‍(20), വിവേക്(20), ജോസഫ്(20), പ്രിന്‍സ്(20), വിഷ്ണു(20), ഷോണ്‍(20), എന്നിവരാണു പിടിയിലായത്.
നഗരത്തിലെ സ്‌കൂളുകളിലെയും കോളജുകളിലേയും വിദ്യാര്‍ഥികള്‍ക്കു കഞ്ചാവ് എത്തിക്കുന്നവരാണു പിടിയിലായവരെന്നു പൊലിസ് പറഞ്ഞു. ഡെപ്യൂട്ടി പൊലിസ് കമ്മീഷണര്‍ യതീഷ് ചന്ദ്ര ഐപി.എസിനു കിട്ടിയ രഹസ്യവിവരത്തിന്റെ അടിസ്ഥാനത്തില്‍ സ്‌പെഷ്യല്‍ ബ്രാഞ്ച് അസിസ്റ്റന്റ് കമ്മീഷണര്‍ കെ.വി വിജയന്റെ നിര്‍ദേശ പ്രകാരം ഷാഡോ പൊലിസിന്റെ രഹസ്യ നിരീക്ഷണത്തിലായിരുന്നു പിടിയിലായവര്‍. സെന്‍ട്രല്‍ പൊലിസ് സബ് ഇന്‍സ്‌പെക്ടര്‍ വിജയശങ്കറുടെ നേതൃത്വത്തില്‍ പ്രതികളെ അറസ്റ്റുചെയ്തു.