രാജാക്കാട്: തമിഴ്‌നാട്ടില്‍ നിന്നും കടത്തികൊണ്ടുവന്ന കഞ്ചാവുമായി യുവാവ്  പിടിയില്‍. ബോഡിമെട്ട് എക്‌സൈസ് ചെക്കുപോസ്റ്റില്‍ വാഹന പരിശോധനയിക്കിടെയാണ് ശാന്തമ്പാറ കൂന്തപ്പന തേരി സ്വദേശി ചന്ദ്രന്‍ (28)  പിടിയിലായത്. മുമ്പ് വീട്ടുവളപ്പില്‍ കഞ്ചാവ് ചെടി നട്ടുവളര്‍ത്തിയ കേസിലെ പ്രതികൂടിയാണ് ചന്ദ്രന്‍.
തമിഴ്‌നാട്ടില്‍ നിന്നും കഞ്ചാവ് വാങ്ങി ബോഡിമെട്ടില്‍ ബസ്സിറങ്ങിയതിന് ശേഷം കാല്‍നടയായി ചെക്കുപോസ്റ്റ് കടക്കുന്നതിനിടിയില്‍ സംശയം തോന്നിയ എക്‌സൈസ് ചെക്കുപോസ്റ്റിലെ ജീവനക്കാര്‍ നടത്തിയ പരിശോധനയിലാണ് പ്ലാസ്റ്റിക് കൂടില്‍ പതിനെട്ട് ചെറുപൊതികളാക്കി സൂക്ഷിച്ചിരുന്ന കഞ്ചാവ് പിടികൂടുന്നത്.
വീട്ടുവളപ്പില്‍ കഞ്ചാവ് ചെടി നട്ടുവളര്‍ത്തിയ കേസില്‍  ജാമ്യത്തിലിറങ്ങി ഒരു മാസം പിന്നിടുന്നതിന് മുമ്പാണ് വീണ്ടും ചന്ദ്രന്‍ കഞ്ചാവുമായി പിടിയിലായത്. ശാന്തമ്പാറ, പൂപ്പാറ എന്നിവടങ്ങള്‍ കേന്ദ്രീകരിച്ച് വിനോദ സഞ്ചാരികള്‍ക്കക്കിടയില്‍ ഉള്‍പ്പെടെ കഞ്ചാവ് പൊതിവില്‍പ്പന നടത്തുന്ന സംഘത്തിലെ പ്രധാന കണ്ണികൂടിയാണ് ചന്ദ്രന്‍. പ്രതിയെ നെടുങ്കണ്ടം കോടതിയില്‍ ഹാജരാക്കി.