വളാഞ്ചേരി: അനധികൃത വില്‍പനയ്ക്കു കൊണ്ടുവന്ന വിദേശ മദ്യവും നിരോധിത പാന്‍ ഉല്‍പന്നങ്ങളും വളാഞ്ചേരി പൊലിസ് പിടികൂടി. ഇന്നലെ വൈകിട്ട് വളാഞ്ചേരി കിഴക്കേക്കര റോഡില്‍ പൊലിസ് പട്രോളിങ് നടത്തുന്നതിനിടയിലാണ് മദ്യവും പാന്‍ ഉല്‍പന്നങ്ങളും പിടികൂടിയത്.
സ്‌കൂട്ടറില്‍ കൊണ്ടുപോകുകയായിരുന്ന ഏഴര ലിറ്റര്‍ മദ്യമാണ് പിടികൂടിയത്. പ്രതി വാഹനം ഉപേക്ഷിച്ച് ഓടി രക്ഷപ്പെട്ടു. സംശയംതോന്നി വാഹനം പരിശോധിച്ചതില്‍ രണ്ടു ബാഗുകളിലായി അര ലിറ്ററിന്റെ 15 കുപ്പി വിദേശമദ്യവും നിരോധിത പാന്‍ ഉല്‍പന്നങ്ങളും കണ്ടെടുത്തു. സ്‌കൂട്ടറും മദ്യവും പൊലിസ് കസ്റ്റഡിയിലെടുത്തു. സ്‌കൂട്ടറിന്റെ ആര്‍.സി ഓണര്‍ ആരാണെന്നു പരിശോധിച്ച് വാഹനം ഓടിച്ചയാളെ ഉടന്‍ പിടികൂടുമെന്നു പൊലിസ് അറിയിച്ചു.