കോഴിക്കോട്: അന്താരാഷ്ട്ര സെമിനാര്‍ 'തനിമ- 2017' ന് ഇന്ന് കോഴിക്കോട് നാഷണല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി (എന്‍.ഐ.ടി) യില്‍ തുടക്കമാകും. നാഷനല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ ആര്‍ക്കിടെക്ച്ചര്‍ വിഭാഗം ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ആര്‍ക്കിടെക്റ്റ്‌സ് (ഐ.ഐ.എ) കോഴിക്കോട് ചാപ്റ്ററിന്റെയും പൂനെ എക്‌സിസ്റ്റെന്‍ഷ്യല്‍ നോളജ് ഫൗണ്ടേഷന്റെയും സഹകരണത്തോടെയാണ് സെമിനാര്‍ സംഘടിപ്പിക്കുന്നത്.
'ഡിസൈന്‍ അധ്യയനത്തിലെ വെല്ലുവിളികളും വാസ്തുവിദ്യയിലെ സൗന്ദര്യശാസ്ത്രവും' എന്ന വിഷയത്തിലാണ് സെമിനാര്‍ നടക്കുകയെന്ന് നാഷനല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ ആര്‍ക്കിടെക്ച്ചര്‍ വിഭാഗം അസോസിയേറ്റ് പ്രൊഫസറായ പി.പി അനില്‍കുമാര്‍ പറഞ്ഞു.
രാവിലെ 9.30 ന് എന്‍.ഐ.ടി കോഴിക്കോട് ഡയറക്ടര്‍ ഡോ.ശിവജി ചക്രവര്‍ത്തി കാംപസ് ഓഡിറ്റോറിയത്തില്‍ സെമിനാര്‍ ഉദ്ഘാടനം ചെയ്യും.
പ്രശസ്ത ആര്‍ക്കിടെക്റ്റ് അനുപമ കുണ്ടു, എഴുത്തുകാരനും ഗവേഷകനുമായ പവന്‍ ഗുപ്ത, ക്ലോഡ് അല്‍വാരിസ്, കലാരക്ഷ ട്രസ്റ്റിന്റെ സഹ സ്ഥാപകയായ ജൂഡി ഫ്രേറ്റര്‍ തുടങ്ങിയവര്‍ മുഖ്യപ്രഭാഷണം നടത്തും.