കൊച്ചി: സംസ്ഥാനത്ത് പച്ചക്കറിക്ക് വില തോന്നുന്നതുപോലെ. കനത്ത ചൂടിനെ തുടര്‍ന്ന് തമിഴ്‌നാട്ടില്‍ നിന്ന് പച്ചക്കറികളുടെ വരവ് കുറഞ്ഞതിനെതുടര്‍ന്ന് വില കുതിച്ചുയരുന്ന സാഹചര്യത്തിലാണ് മാര്‍ക്കറ്റില്‍ പച്ചക്കറിവില തോന്നുന്നതുപോലെ ഈടാക്കുന്നത്.
തമിഴ്‌നാട്ടിലെ വരള്‍ച്ച ഏറ്റവും കൂടുതല്‍ ബാധിച്ചിരിക്കുന്നത് പച്ചമുളക് കൃഷിയെയായതിനാല്‍ കേരളത്തില്‍ ഏറ്റവും കൂടുതല്‍ വില നല്‍കേണ്ടത് ഇപ്പോള്‍ പച്ചമുളകിനാണ്.
ഒരുമാസം മുന്‍പ് ഒരു കിലോ പച്ചമുളകിന് മൊത്തവ്യാപാര കേന്ദ്രത്തില്‍ 38-40 രൂപ ആയിരുന്നത് ഇന്നലെ 85-100 രൂപയായാണ് വര്‍ധിച്ചത്. വിളവ് കുറഞ്ഞതു മുതല്‍ വില കുതിച്ചുയരുന്ന അവസ്ഥയാണ്. എന്നാല്‍ മൊത്തവ്യാപാരികളും ചില്ലറവ്യാപാരികളും പച്ചക്കറികള്‍ക്ക് തോന്നുന്നതുപോലെ വില ഈടാക്കുന്നുവെന്ന ആക്ഷേപവും ഉയര്‍ന്നിട്ടുണ്ട്. ഇന്നലെ പച്ചമുളക് കിലോയ്ക്ക് 140 രൂപവരെയാണ് ചില്ലറ വിപണിയില്‍ ഈടാക്കുന്നത്.
ബീന്‍സ്, തക്കാളി, ഇഞ്ചി, മുരിങ്ങക്ക, കൊത്തമര, ക്യാരറ്റ് എന്നിവയ്ക്കും വില കുത്തനെ ഉയര്‍ന്നിട്ടുണ്ട്. ഒരു മാസം മുന്‍പ് മൊത്തവ്യാപാര കേന്ദ്രത്തില്‍ 40 രൂപയുണ്ടായിരുന്ന ബീന്‍സിന് വില ഇപ്പോള്‍ 80 ല്‍ എത്തിയിരിക്കുകയാണ്. അതുപോലെ കൊത്തമരയുടെ വില 24ല്‍ നിന്ന് 36 ആയും മുരിങ്ങക്കയുടെ വില 30ല്‍ നിന്ന് 40 ആയും ഉയര്‍ന്നിട്ടുണ്ട്.
മല്ലിയിലയ്ക്കും പുതീനയ്ക്കും വില ഇരട്ടിയായാണ് വര്‍ധിച്ചിരിക്കുന്നത്.55 രൂപ വിലയുണ്ടായിരുന്ന മല്ലിയിലയുടെ വില 110 ആയി ഉയര്‍ന്നു. 40 രൂപയുണ്ടായിരുന്ന പുതീനയുടെ വില 80 ആയി ഉയര്‍ന്നു. വരുംദിവസങ്ങളില്‍ കൂടുതല്‍ പച്ചക്കറി ലോഡുകള്‍ തമിഴ്‌നാട്ടില്‍ നിന്ന് എത്തിയില്ലെങ്കില്‍ വില ഇനിയും കൂടുന്ന അവസ്ഥയാണ്. വേനലവധികഴിഞ്ഞ് സ്‌കൂളുകള്‍ തുറക്കുന്നതോടെ പച്ചക്കറിക്ക് ആവശ്യം കൂടുകയും ചെയ്യും.
സവാള, പച്ചമാങ്ങ, ഉള്ളി എന്നിവയ്ക്ക് വില കൂടിയിട്ടില്ലെങ്കിലും മഴക്കാലമാകുമ്പോള്‍ സവാളയ്ക്കും ഉള്ളിക്കും വില കുതിച്ചുയരുമെന്നാണ് വിപണിവൃത്തങ്ങള്‍ സൂചിപ്പിക്കുന്നത്.
മഹാരാഷ്ട്രയില്‍ നിന്നാണ് കേരളത്തില്‍ സവാളയും ഉള്ളിയുമെത്തുന്നത്. മഴക്കാലം മുന്‍നിര്‍ത്തി പച്ചക്കറികളുടെ വില സര്‍ക്കാര്‍ നിയന്ത്രിക്കണമെന്ന ആവശ്യം ശക്തമായിരിക്കുകയാണ്.