പാരിസ്: യൂറോപ്യന്‍ യൂണിയനില്‍ തുര്‍ക്കിക്ക് അംഗത്വം നല്‍കണമെന്ന ആവശ്യം ആവര്‍ത്തിച്ച് പ്രസിഡന്റ് റജബ് ത്വയ്യിബ് ഉര്‍ദുഗാന്‍. പാരിസ് സന്ദര്‍ശന വേളയില്‍ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണുമായി ചര്‍ച്ച നടത്തിയ ശേഷം സംസാരിക്കുകയാരുന്നു അദ്ദേഹം.

''യൂറോപ്യന്‍ യൂണിയനില്‍ അംഗത്വം വേണമെന്ന് ഞങ്ങള്‍ക്ക് തുടരെത്തുടരെ ആവശ്യപ്പെടാനാവില്ല, ദയവ് ചെയ്ത് ഞങ്ങള്‍ക്ക് കൂടി തരൂ''- ഉര്‍ദുഗാന്‍ പറഞ്ഞു. അംഗത്വം ചോദിച്ച് ക്ഷീണിച്ചെന്നും അദ്ദേഹം പറഞ്ഞു.

സംഘത്തില്‍ ചേരാന്‍ വേണ്ടി പതിറ്റാണ്ടുകളായി ഞങ്ങള്‍ വാതിലിനു പുറത്ത് കാത്തിരിക്കുകയാണെന്നും അദ്ദേഹം പറഞ്ഞു.

1987 ല്‍ തുര്‍ക്കി യൂറോപ്യന്‍ യൂണിയനില്‍ അംഗത്വം ചോദിച്ചു. 1997 ല്‍ അംഗത്വത്തിന് യോഗ്യത നേടി. അംഗത്വത്തിനുള്ള ചര്‍ച്ചകള്‍ 2005 ലും തുടങ്ങി. എന്നാല്‍ കഴിഞ്ഞ കുറച്ചുവര്‍ഷങ്ങളായി ഇക്കാര്യത്തില്‍ ഒരു നീക്കവും നടന്നിട്ടില്ല.

''കാരണം ചോദിക്കുമ്പോള്‍ ഇ.യുവിന് പറയാനാവുന്നില്ല. ആദ്യം 15 ചാപ്റ്റര്‍ (ഇ.യു പോളിസി) തടസ്സമാണെന്നു പറഞ്ഞു. പിന്നീടത് 35 ചാപ്റ്ററാക്കി ഉയര്‍ത്തി'' -ഉര്‍ദുഗാന്‍ പറഞ്ഞു.

ഇ.യുവില്‍ അംഗത്വം ലഭിക്കാന്‍ ഇ.യു പോളിസി നിര്‍ദേശിക്കുന്ന 35 ചാപറ്ററുകള്‍ വിജയകരമായി നിര്‍വ്വഹിക്കണമെന്നാണ് തത്വം.