തൃശൂര്‍: കടലിരമ്പത്തിനൊപ്പം കോഴിക്കോട് നൈനാംവളപ്പിലെ റഹീം തന്റെ നെഞ്ചില്‍ കനലായി കൊണ്ട് നടന്നിരുന്ന ഒരു സ്വപ്‌നമായിരുന്നു തബലയില്‍ കൊട്ടിത്തെളിയുകയെന്നത്. എന്നാല്‍ വറുതിയുടെ കാലത്തെ അതിജീവിക്കാന്‍ തന്റെ ബാല്യവും കൗമാരവും അയാള്‍ക്ക് കടലിനോട് പടപൊരുതേണ്ടിവന്നു.
എങ്കിലും തന്റെയുള്ളില്‍ കെടാവിളക്കായി തബല പഠിക്കുകയെന്ന സ്വപ്‌നം അയാള്‍ കൊണ്ടുനടക്കുന്നുണ്ടായിരുന്നു. സ്വപ്‌നത്തിലേക്ക് 23ാം വയസില്‍ അയാള്‍ നടന്നുകയറിയെങ്കിലും മികവ് തെളിയിക്കാനുതകുന്ന വേദികളൊന്നും അയാള്‍ക്ക് ലഭിച്ചില്ല. അങ്ങിനെയിരിക്കെയാണ് തന്റെ മകന് അയാള്‍ തന്നെ അവന്റെ ആറാം വയസില്‍ തബലയുടെ ബാലപാഠങ്ങള്‍ ചൊല്ലിക്കൊടുക്കുന്നത്. അതിന്ന് എത്തിനില്‍ക്കുന്നത് പിതാവിന്റെ സ്വപ്‌നങ്ങളുടെ സാക്ഷാല്‍ക്കാരത്തിലാണ്.
തൃശൂരില്‍ നടക്കുന്ന 58ാമത് സംസ്ഥാന സ്‌കൂള്‍ കലോത്സവത്തിന്റെ ഏറ്റവും അഭിമാന നിമിശങ്ങളിലൊന്നായി തന്റെ മകന്‍ തബലയില്‍ താളങ്ങള്‍ പകര്‍ന്നപ്പോള്‍ ആ പിതാവിന്റെ കണ്ണുകള്‍ സന്തോഷംകൊണ്ട് നിറഞ്ഞു.
നൂറാം വാര്‍ഷികം ആഘോഷിക്കുന്ന പരപ്പില്‍ മദ്‌റസത്തുല്‍ മുഹമ്മദിയ്യ ഹയര്‍സെക്കന്‍ഡറി സ്‌കൂളും മുഹമ്മദ് അജ്മലെന്ന ഈ മിടുക്കന്റെ മികവില്‍ സന്തോഷക്കടല്‍ തീര്‍ത്തു.
നൂറു വര്‍ഷങ്ങള്‍ക്കിടെ ഇതാദ്യമായാണ് ഉപകരണ കലയില്‍ സംസ്ഥാന തലത്തില്‍ സ്‌കൂളിന് അംഗീകാരം ലഭിക്കുന്നത്. കടലോര മേഖലയിലെ കുട്ടികള്‍ പഠിക്കുന്ന ഈ സ്‌കൂള്‍ സംസ്ഥാന തലങ്ങളില്‍ മാപ്പിള കലകളിലടക്കം നലരവധി സമ്മാനങ്ങള്‍ നേടിയിരുന്നു. ഒരു നാടിന്റെ മൊത്തം സ്വപ്‌നങ്ങളുമായാണ് മുഹമ്മദ് അജ്മല്‍ കോഴിക്കോട് നിന്നും ഡി.ഡി.ഇയുടെ അപ്പീലുമായി തൃശൂര്‍ക്ക് തിരിച്ചത്.
മടങ്ങുന്നത് നാട് തന്നിലര്‍പ്പിച്ച വിശ്വാസം കാത്തുസൂക്ഷിച്ചും. മാതാവ് സുഹറാബിയും സഹോദരിമാരായ സുഹൈറ റമീസയും ആയിശ അഫ്‌റയും അജ്മലിനും പിതാവിനും പൂര്‍ണ പിന്തുയുമായി രംഗത്തുണ്ട്.
പിതാവിനെയും പുത്രനെയും തബലയില്‍ മായാജാലം തീര്‍ക്കാന്‍ പ്രാപ്തനാക്കുന്നത് കോഴിക്കോട് ബാബുരാജ് സംഗീത അക്കാദമിയിലെ ആനന്ദ് കൃഷ്ണനും മൊയ്തീന്‍ കോയയുമാണ്.