ആലക്കോട്: അനധികൃതമായി കടത്തുകയായിരുന്ന ആറു ലിറ്റര്‍ വിദേശമദ്യവുമായി ഓട്ടോറിക്ഷാ ഡ്രൈവര്‍ എക്‌സൈസ് സംഘത്തിന്റെ പിടിയിലായി. വെള്ളരിക്കുണ്ട് സ്വദേശി തെക്കടശ്ശേരിയില്‍ ബിജു സ്‌കറിയ(33) യാണ് അറസ്റ്റിലായത്. വെള്ളിയാഴ്ച ഉച്ചയോടെ തേര്‍ത്തല്ലിക്കടുത്ത് പെരിങ്ങാലയില്‍ വാഹന പരിശോധന നടത്തുകയായിരുന്ന എക്‌സൈസ് സംഘമാണ് ഇയാളെ പിടികൂടിയത്. ഓട്ടോറിക്ഷയുടെ പിറകു വശത്തെ നമ്പര്‍ ചുരണ്ടി മാറ്റിയ നിലയിലായിരുന്നു. ഓട്ടോറിക്ഷയും കസ്റ്റഡിയില്‍ എടുത്തു. സ്ഥിരമായി  മദ്യം കടത്തുന്നയാളാണ് ഇയാളെന്ന് എക്‌സൈസ് ഉദ്യോഗസ്ഥര്‍ അറിയിച്ചു.
പ്രിവന്റിവ് ഓഫിസര്‍ സി.സി രാജന്‍, സിവില്‍ എക്‌സൈസ് ഓഫിസര്‍മാരായ ഉല്ലാസ് ജോസ്, ധനേഷ്, സജീവന്‍, രാജീവന്‍, സുരേന്ദ്രന്‍ എന്നിവരടങ്ങുന്ന സംഘമാണ് ഇയാളെ അറസ്റ്റു ചെയ്തത്.