ചേറ്റുവ: ദേശീയപാത 17 ചേറ്റുവ പാലത്തിനു മുകളില്‍ വീണ്ടും അപകടം. എറണാകുളത്തു നിന്നും കോഴിക്കാട്ടേക്ക് പോകുകയായിരുന്ന കെ.എസ്.ആര്‍.ടി.സി ബസും ഇനോവ കാറുമാണ് അപകടത്തില്‍പ്പെട്ടത്. രാവിലെ നേരിയ തോതില്‍ മഴ പെയ്തിരുന്നു.
 ഇതിനിടേയായിരുന്നു അപകടം. ഇനോവ കാര്‍ പാലത്തിലെ ടാറിങില്‍ നിന്നും തെന്നിമാറിയതോടെ ബ്രേക്കിടുകയും തൊട്ടു പുറകില്‍ വന്ന കെ.എസ്.ആര്‍.ടി.സി ബസ് കാറിനു പുറകില്‍ ഇടിക്കുകയുമായിരുന്നു. ഇടിയുടെ ആഘാതത്തില്‍ കാറിന്റെ പിന്‍ഭാഗം ഭാഗികമായി തകര്‍ന്നു. ബസിന്റെ മുന്‍ ഭാഗവും തകര്‍ന്നിട്ടുണ്ട്. അശാസ്ത്രീയമായ ടാറിങ് മൂലും ചേറ്റുവ പാലത്തില്‍ അപകടങ്ങള്‍ പതിവായിരിക്കുകയാണ്. കഴിഞ്ഞ ദിവസം ടാങ്കര്‍ ലോറി
നിയന്ത്രണം വിട്ട് പാലത്തിന്റെ താഴ്ചയിലേക്ക് മറിയുകയും കെ.എസ്.ആര്‍.ടി.സി ബസ് നിയന്ത്രണം വിട്ട് പാലത്തിലെ ഫുട്പാത്തില്‍ ഇടിച്ചു കയറി കൈവരികളില്‍ ഇടിച്ചു നില്‍ക്കുകയും ചെയ്തിരുന്നു. തുടര്‍ന്ന് ചാവക്കാട് പൊലിസും ദേശീയപാത അധികൃതരും സ്ഥലം സന്ദര്‍ശിച്ച് അപകടത്തിന് പരിഹാരം കാണുന്നതിനുള്ള നടപടികള്‍ കൈക്കൊള്ളാമെന്ന് ഉറപ്പു നല്‍കി പോയതിനു തൊട്ടുപിറ്റേന്നാണ് വീണ്ടും അപകടമുണ്ടായത്.