കണ്ണൂര്‍: ഭീകര സംഘടനയായ ഇസ്‌ലാമിക് സ്‌റ്റേറ്റില്‍ ചേര്‍ന്നെന്ന് സംശയിക്കുന്ന ഒരു കണ്ണൂര്‍ സ്വദേശി കൂടി കൊല്ലപ്പെട്ടുവെന്ന് വിവരം. വളപട്ടണം മന്ന സ്വദേശി മനാഫ് (27) സിറിയയില്‍ വച്ച് കൊല്ലപ്പെട്ടതായിട്ടാണ് ബന്ധുക്കളെ വിവരം അറിയിച്ചിരിക്കുന്നത്.
ഇതിനെ തുടര്‍ന്ന് പൊലിസ് രഹസ്യാന്വേഷ വിഭാഗം നടത്തിയ അന്വേഷണത്തില്‍ കഴിഞ്ഞ നവംബറില്‍ ഇയാള്‍ കൊല്ലപ്പെട്ടതായി സൂചന ലഭിച്ചിട്ടുണ്ട്. കണ്ണൂരിലെ ഡി.വൈ.എഫ്.ഐ പ്രവര്‍ത്തകന്‍ ഒ.ടി വിനീഷിനെ കൊലപ്പെടുത്തിയ കേസിലെ ഒന്നാം പ്രതിയായിരുന്നു മനാഫ്. ഈ കേസില്‍ മനാഫിനെതിരേ വളപട്ടണം പൊലിസ് സ്‌റ്റേഷനില്‍ കേസുണ്ട്. എന്നാല്‍ ഒളിവില്‍ പോയ മനാഫ് സിറിയയിലേക്ക് കടക്കുകയായിരുന്നുവെന്നാണ് കരുതുന്നത്. കണ്ണൂരില്‍ നിന്നും 15 പേര്‍ സിറിയയില്‍ എത്തി ഐ.എസില്‍ ചേര്‍ന്നുവെന്നാണ് പൊലിസ് പറയുന്നത്. ഇതില്‍ അഞ്ചു പേര്‍ കൊല്ലപ്പെട്ടിരുന്നു. തിരിച്ചെത്തിയ അഞ്ചു പേരെ പൊലിസ് അറസ്റ്റു ചെയ്തിട്ടുമുണ്ട്.