ദുബൈ: 2025 ഐസിസി ചാംപ്യൻസ്‌ ട്രോഫി കിരീടം സ്വന്തമാക്കിയിരിക്കുകയാണ് ഇന്ത്യ. ദുബൈയിൽ നടന്ന ഫൈനൽ പോരാട്ടത്തിൽ ന്യൂസിലാന്റിനെ നാല് വിക്കറ്റുകൾക്ക് പരാജയപ്പെടുത്തിയാണ് ഇന്ത്യ കിരീടം ചൂടിയത്. മത്സരത്തിൽ ടോസ് നേടി ആദ്യം ബാറ്റ് ചെയ്ത കിവീസ് ഏഴ് വിക്കറ്റ് നഷ്ടത്തിൽ 251 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ഇന്ത്യ ആറ് വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു.

ഇന്ത്യയുടെ കിരീടനേട്ടത്തിന് പിന്നാലെ ക്യാപ്റ്റര്‍ രോഹിത് ശർമ്മ ടീമിന്റെ വിജയത്തിൽ തന്റെ സന്തോഷം പ്രകടിപ്പിക്കുകയും ചെയ്തു. ടൂർണമെന്റിൽ മികച്ച ക്രിക്കറ്റന് ഇന്ത്യ കളിച്ചതെന്നും ഇത് വളരെ മികച്ചൊരു നിമിഷമാണെന്നുമാണ് രോഹിത് പറഞ്ഞത്. 

'ഇത് വളരെ മികച്ചൊരു നിമിഷമാണ്. ടൂർണമെന്റിലുടനീളം ഞങ്ങൾ മികച്ച ക്രിക്കറ്റാണ് കളിച്ചത്. ഇന്നത്തെ മത്സരത്തിൽ മികച്ച രീതിയിൽ കളിക്കാൻ സാധിച്ചതിൽ ഞാൻ വളരെയധികം സന്തോഷവാനാണ്. 2023 ലോകകപ്പിൽ രാഹുൽ ഭായ് ഇപ്പോൾ ഗൗതി ഭായ് ഇവർക്കൊപ്പം ഞാൻ ഇത്തരത്തിൽ മികച്ച നിമിഷങ്ങൾ ആസ്വദിച്ചു. മത്സരങ്ങളിൽ വ്യത്യസ്തമായ രീതിയിൽ കളിക്കണമെന്ന് ഞാൻ ആഗ്രഹിച്ചു. ഈ മത്സരത്തിൽ പിച്ചിന്റെ സ്വഭാവം ഞങ്ങൾ മനസ്സിലാക്കിയിരുന്നു. ഞാൻ സ്റ്റാംപിങ്ങിലൂടെയാണ് പുറത്തായത്. കുറച്ചു മത്സരങ്ങളായി ഞാൻ ഇത്തരത്തിലാണ് പുറത്തായിരുന്നത്. എന്നാൽ പിന്നീട് എത്തിയവർ എളുപ്പത്തിൽ കളിച്ചുകൊണ്ട് ടീമിനെ വിജയത്തിൽ എത്തിച്ചു. ഇതുകൊണ്ടാണ് ഞാൻ ടീമിൽ വലിയ ബാറ്റിങ് ഡെപ്ത് ഉണ്ടാവണമെന്ന് ആഗ്രഹിച്ചത്. രവീന്ദ്ര ജഡേജ വരെ എട്ടാം നമ്പറിൽ മികച്ച രീതിയിലാണ് കളിച്ചത്,' രോഹിത് ശർമ പറഞ്ഞു. 

മത്സരത്തിൽ രോഹിത്തിന്റെ തകർപ്പൻ പ്രകടനമാണ്‌ രോഹിത് നടത്തിയിരുന്നത്. അർദ്ധ സെഞ്ച്വറി നേടിയാണ് ഇന്ത്യൻ ക്യാപ്റ്റൻ തിളങ്ങിയത്.  ഏഴ് ഫോറുകളും മൂന്ന് സിക്സുകളും അടക്കം 83 പന്തിൽ 76 റൺസായിരുന്നു രോഹിത് നേടിയത്. ശ്രേയസ് അയ്യർ 62 പന്തിൽ 48 റൺസും 50 പന്തിൽ 31 റൺസ് നേടി ശുഭ്മൻ ഗില്ലും ഇന്ത്യയുടെ വിജയത്തിൽ നിർണായകമായി.

മത്സരത്തിൽ ആദ്യം ബാറ്റ് ചെയ്ത ന്യൂസിലാൻഡിന് വേണ്ടി ഡാറിൽ മിച്ചൽ, മൈക്കൽ ബ്രെയസ്വെൽ എന്നിവർ അർദ്ധ സെഞ്ച്വറി നേടി തകർപ്പൻ പ്രകടനമാണ് നടത്തിയത്. 101 പന്തിൽ മൂന്ന് ഫോറുകൾ ഉൾപ്പെടെ 63 റൺസ് ആണ് മിച്ചൽ നേടിയത്. ബ്രെയ്സ്വെൽ 40 പന്തിൽ പുറത്താവാതെ 53 റൺസും നേടി. മൂന്ന് ഫോറുകളും രണ്ട് സിക്സും അടങ്ങുന്നതായിരുന്നു താരത്തിന്റെ ഇന്നിങ്സ്.

ഇന്ത്യൻ ബൗളിങ്ങിൽ വരുൺ ചക്രവർത്തി, കുൽദീപ് യാദവ് എന്നിവർ രണ്ട് വിക്കറ്റുകൾ നേടി തകർപ്പൻ പ്രകടനമാണ് നടത്തിയത്. രവീന്ദ്ര ജഡേജ, മുഹമ്മദ് ഷമി എന്നിവർ ഓരോ വിക്കറ്റുകളും വീഴ്ത്തി നിർണായകമായി.

ടൂർണമെന്റിൽ ഒരു മത്സരം പോലും പരാജയപ്പെടാതെയാണ് ഇന്ത്യ ചാമ്പ്യൻമാരായത്. ഗ്രൂപ്പ് ഘട്ടത്തിൽ ബംഗ്ലാദേശ്, പാകിസ്താൻ, ന്യൂസിലാൻഡ് എന്ന ടീമുകളെ പരാജയപ്പെടുത്തി ചാമ്പ്യന്മാർ ആയിട്ടായിരുന്നു ഇന്ത്യ സെമിയിലേക്ക് മുന്നേറിയത്. സെമിയിൽ ഓസ്ട്രേലിയയെയും കീഴടക്കി ഇന്ത്യ ഫൈനലിലേക്ക് മുന്നേറിയിരുന്നത്.