അജ്മാൻ: അജ്മാനിലെ ബ്രിട്ടിഷ് വിദ്യാലയമായ ‘ദി ബ്ലൂമിങ്ങ്ടൺ അക്കാദമി’ പത്താം വാർഷിക നിറവിൽ. ഈ മാസം അഞ്ചിന് നടന്ന വാർഷികാഘോഷ പരിപാടിയിൽ യു.എ.ഇയിലെ ബ്രിട്ടിഷ് അംബാസഡർ എഡ്വേർഡ് ഹോബർട്ട് മുഖ്യാതിഥിയായി പങ്കെടുത്തു.

അംബാസഡറും നോർത്ത് പോയിന്റ് എജുകേഷൻ (എൻ.പി.ഇ) ചെയർമാൻ ലാൻസൺ ലാസറും വാർഷികാഘോഷ ഭാഗമായി സ്കൂളിൽ വൃക്ഷത്തൈ നട്ട് ശിലാഫലകം അനാച്ഛാദനം ചെയ്തു. ശാസ്ത്ര രംഗത്തെ മുന്നേറ്റം വ്യക്തമാക്കുന്ന പരിപാടികൾ, 'ജെയിൻ ഓസ്റ്റിൻ' നാടകാവതരണം, സംഗീത പരിപാടി, മോഡൽ യു.എൻ, ടെഡ്എക്സ് എന്നിവ ഇതിന്റെ ഭാഗമായി സംഘടിപ്പിച്ചിരുന്നു.

ജീവകാരുണ്യ പ്രവർത്തനങ്ങളുടെ ഭാഗമായി ബ്ലൂമിങ്ങ്ടൺ അക്കാദമി റെഡ് ക്രസന്റിന് ധനസഹായം കൈമാറി. ഇതോടൊപ്പം നടന്ന ഇഫ്താർ സംഗമത്തിൽ അംബാസഡർ എഡ്വേർഡ് ഹോബർട്ട് സ്കൂളിലെ രക്ഷിതാക്കളുമായി കൂടിക്കാഴ്ച നടത്തി.

2014ലാണ് ബ്ലൂമിങ്ടൺ അക്കാദമി ആരംഭിച്ചത്. ആറു മാസത്തിനകം നിർമാണം പൂർത്തിയാക്കിയ ഈ വിദ്യാലയം പത്ത് വർഷത്തിനകം വലിയ നേട്ടമാണുണ്ടാക്കിയതെന്ന് ബ്രിട്ടിഷ് സ്ഥാനപതി ചൂണ്ടിക്കാട്ടി. പത്ത് വർഷത്തിനിടെ സ്കൂൾ നേടിയ അംഗീകാരങ്ങൾ ഈ സ്ഥാപനത്തിന് പിന്നിൽ നടക്കുന്ന പ്രയത്നങ്ങളുടെ തെളിവാണെന്നും അദ്ദേഹം പറഞ്ഞു.

ഇത്രയും കാലത്തിനിടെ ബ്ലൂമിങ്ടൺ അക്കാദമി നേടിയത് മികവ് മാത്രമല്ല, ക്രിയാത്മക പ്രയത്നത്തിന്റേയും, വിദ്യാഭ്യാസ മേഖലയിലെ ലക്ഷ്യബോധത്തിന്റെയും നേട്ടങ്ങൾ കൂടിയാണെന്ന് ലാൻസൺ ലാസർ പറഞ്ഞു. മികച്ച ഭാവി രൂപപ്പെടുത്താനാണ് ഈ വിദ്യാലയം ശ്രമിക്കുന്നതെന്നും അദ്ദേഹം കൂട്ടിച്ചേർത്തു. 
64 രാജ്യങ്ങളിലെ വിദ്യാർഥികൾ ഇപ്പോൾ ബ്ലൂമിങ്ടണിൽ പഠിക്കുന്നുണ്ട്. ഏർലി ഇയേഴ്സ് ഫൗണ്ടേഷൻ സ്റ്റേജ് (ഇ.വൈ.എഫ്.എസ്) മുതൽ എ ലെവലുകളും, ബി.ടി.ഇ.സി കോഴ്സുകളും ഉൾപ്പെടുത്തി ബ്ലൂമിങ്ങ്ടൺ അക്കാദമി ഭാവിയിൽ കൂടുതൽ വളർച്ചയ്ക്ക് തയാറെടുക്കുകയാണെന്നും സ്കൂൾ അധികൃതർ പറഞ്ഞു. സ്കൂളിന്റെ സ്ഥാപക കുടുംബാംഗങ്ങൾ, വിദ്യാർഥികൾ, അധ്യാപകർ തുടങ്ങിയവർ ആഘോഷ പരിപാടികളിൽ പങ്കെടുത്തു.