ബ്ലൂ മൂണും ബ്ലഡ് മൂണും സൂപ്പര്‍ മൂണും ഒന്നിച്ചെത്തുന്നു. 152 വര്‍ഷങ്ങള്‍ക്ക് ശേഷം സംഭവിക്കുന്ന ചന്ദ്രവിസ്മയം ജനുവരി 31ന് വീക്ഷിക്കാം.

ജനുവരി 31നാണ് സമ്പൂര്‍ണ ചന്ദ്രഗ്രഹണം. കിഴക്കന്‍ ചക്രവാളത്തില്‍ ചന്ദ്രന്റെ ഉദയം ഗ്രഹണത്തോടെയാണ്. ഓറഞ്ച് കലര്‍ന്ന ചുവപ്പ് നിറത്തിലായിരിക്കും ചന്ദ്രനെ ദൃശ്യമാകുക. വൈകീട്ട് 6.20 മുതല്‍ പൂര്‍ണ്ണ ചന്ദ്രഗ്രഹണം ദൃശ്യമാകും.

പൂര്‍ണ ചന്ദ്രഗ്രഹണ സമയത്ത് ചുവപ്പ് നിറത്തില്‍ കാണപ്പെടുന്നതിനാല്‍ ഇത് ബ്ലഡ് മൂണ്‍ പ്രതിഭാസം എന്നറിയപ്പെടുന്നു. കലണ്ടര്‍ മാസത്തിലെ രണ്ടാമത്തെ പൗര്‍ണമിയാണ് ബ്ലൂ മൂണ്‍. ഈ മാസം ജനുവരി രണ്ടിനും പൗര്‍ണമിയായിരുന്നു. 31ന് ചന്ദ്രനെ പതിവിലും വലിപ്പത്തില്‍ കാണാന്‍ സാധിക്കും. ബ്ലൂ മൂണ്‍, ബ്ലഡ് മൂണ്‍, സൂപ്പര്‍ മൂണ്‍ പ്രതിഭാസം അവസാനമായി ഒന്നിച്ചെത്തിയത് 1866 മാര്‍ച്ച് 31ലായിരുന്നു.