മേപ്പാടി: ജില്ലയില്‍ വാഹനാപകടങ്ങള്‍ തുടര്‍കഥയായതോടെ അപകടങ്ങളുടെ എണ്ണം കുറക്കാന്‍ മോട്ടോര്‍ വാഹനവകുപ്പും പൊലിസും നടപടി ശക്തമാക്കുന്നു. ദേശീയപാതയിലാണ് അപകടങ്ങള്‍ വര്‍ധിക്കുന്നത്. കഴിഞ്ഞ ഒരാഴ്ച്ചക്കിടെ ദേശീയ പാതയിലുണ്ടായ വ്യത്യസ്ഥ അപകടങ്ങളില്‍ രണ്ടുപേരാണ് മരിച്ചത്. ദേശീയപാതയില്‍ അപകടങ്ങള്‍ കുറക്കുന്നതിന് മൂന്ന് ഇടങ്ങളില്‍ കാമറ സ്ഥാപിക്കാനാണ് അധികൃതരുടെ തീരുമാനം. ചുണ്ടേല്‍, വാര്യാട്, കല്ലൂര്‍ എന്നിവിടങ്ങളിലാവും കാമറ സ്ഥാപിക്കുക. കാമറ സ്ഥാപിക്കുന്നതോടെ അമിതവേഗതയില്‍ പോകുന്ന വാഹനങ്ങളെ പിടികൂടാന്‍ കഴിയും. ഇത്തരത്തില്‍ നടപടികള്‍ വന്നാല്‍ അപകടങ്ങളുടെ എണ്ണം കുറക്കാനാകുമെന്നാണ് അധികൃതരുടെ പ്രതീക്ഷ. കഴിഞ്ഞ ഏതാനം വര്‍ഷങ്ങളില്‍ ഉണ്ടായ വാഹനാപകടങ്ങളുടെ എണ്ണത്തില്‍ ഒരോവര്‍ഷവും കുറവ് വരുന്നുണ്ടെങ്കിലും ദേശീയ പാതയില്‍ അപകട നിരക്ക് ഉയരുകയാണ്. നിലവില്‍ അമിത വേഗതയില്‍ പോകുന്ന വാഹനങ്ങളെ പിടികൂടുന്നതിന്ന് മോട്ടോര്‍ വാഹന വകുപ്പിന്റ പക്കല്‍ സംവിധാനങ്ങള്‍ ഇല്ല. പൊലിസിന് മാത്രമാണ് ഒരു ഇന്റര്‍സെപ്റ്റര്‍ വാഹനം ഉള്ളത്. മോട്ടോര്‍ വാഹന വകുപ്പിനും ഒരു ഇന്റര്‍സെപ്റ്റര്‍ വേണമെന്ന ആവശ്യവും ശക്തമായിട്ടുണ്ട്. പൊലിസ് ഇന്റര്‍സെപ്റ്റര്‍ പ്രവര്‍ത്തനം തുടങ്ങിയതോടെ അപകട നിരക്കില്‍ ഗണ്യമായ കുറവുണ്ടായിട്ടുണ്ടെന്നാണ് കണക്കുകള്‍ പറയുന്നത്.