തോല്‍പ്പെട്ടി: ജലം സംരക്ഷിക്കാന്‍ വനം സംരക്ഷിക്കൂ എന്ന സന്ദേശവുമായി വയനാട് വന്യജീവി സങ്കേതത്തില്‍ കാട്ടുതീക്കെതിരേ പ്രചാരണവും ബോധവല്‍ക്കരണവും നടത്തി. തോല്‍പ്പെട്ടി വന്യജീവി സങ്കേതത്തില്‍ നടന്ന ബോധവല്‍ക്കരണ പരിപാടി കാട്ടിക്കുളത്ത് തിരുനെല്ലി ഗ്രാമപഞ്ചായത്തംഗം സിജിത്ത് ഉദ്ഘാടനം ചെയ്തു. വന്യജീവി കേന്ദ്രത്തിലും പരിസരത്തുമുള്ള വീടുകളിലാണ് വിദ്യാര്‍ഥികള്‍ ലഘുലേഖ, നോട്ടീസ്, പോസ്റ്റര്‍ എന്നിവയുമായി പ്രചാരണവും ബോധവല്‍ക്കരണവും നടത്തിയത്. വയനാട് വൈല്‍ഡ് ലൈഫ് ഡിവിഷന്‍, വൈല്‍ഡ് ലൈഫ് കണ്‍സര്‍വേഷന്‍ സൊസൈറ്റി, വയനാട് പ്രകൃതി സംരക്ഷണ സമിതി എന്നിവ സംയുക്തമായാണ് പരിപാടി സംഘടിപ്പിച്ചത്. ഗാര്‍ഹിക, കാര്‍ഷിക ആവശ്യങ്ങള്‍ക്ക് ജനം ഉപയോഗപ്പെടുത്തുന്ന ജലം കാടിന്റെ വരദാനമാണെന്നും കാടുകളെ എന്തു ത്യാഗംചെയ്തും സംരക്ഷിക്കണമെന്നുമുള്ള സന്ദേശമാണ് വിദ്യാര്‍ഥികള്‍ ചെറുസംഘങ്ങളായി തിരിഞ്ഞ് വീടുകള്‍തോറും പ്രചരിപ്പിച്ചത്.