ബെയ്ജിങ്: പുതിയ മിസൈല്‍വേധ സംവിധാനം വിജയകരമായി പരീക്ഷിച്ചതായി ചൈന. ചൈനീസ് പ്രതിരോധ മന്ത്രാലയമാണ് ഇക്കാര്യം അറിയിച്ചത്. ഒഡിഷ തീരത്ത് ഇന്ത്യ അഗ്നി 1 ബാലിസ്റ്റിക് മിസൈല്‍ വിക്ഷേപിച്ചതിനു തൊട്ടുപിന്നാലെയാണ് ചൈനയുടെ പരീക്ഷണം. എന്നാല്‍ ഇത് മറ്റൊരു രാജ്യത്തെയും ഉദ്ദേശിച്ചല്ലെന്നും തങ്ങളുടെ രാജ്യാതിര്‍ത്തിക്കുള്ളില്‍ തന്നെയാണ് പരീക്ഷണം നടത്തിയതെന്നും പ്രതിരോധ മന്ത്രാലയം പുറത്തിറക്കിയ വാര്‍ത്താക്കുറിപ്പില്‍ പറയുന്നു. ചൈനീസ് സര്‍ക്കാരിന്റെ ഔദ്യോഗിക മാധ്യമമായ സിന്‍ഹുവയും ഇക്കാര്യം സ്ഥിരീകരിച്ചിട്ടുണ്ട്.
ചൈനയുടെ അവകാശവാദം പോലെ മിസൈല്‍വേധ സംവിധാനം പരീക്ഷിച്ചതു രാജ്യാതിര്‍ത്തിക്കുള്ളില്‍ തന്നെയാണെങ്കിലും ഇതുസംബന്ധിച്ച കൂടുതല്‍ വിവരങ്ങള്‍ ലഭ്യമല്ല. നിലവില്‍ ദക്ഷിണകൊറിയന്‍ തീരത്ത് അമേരിക്ക സ്ഥാപിച്ച താഡ് (ടെര്‍മിനല്‍ ഹൈ ആള്‍ട്ടിറ്റിയൂഡ് ഏരിയ ഡിഫന്‍സ്) മിസൈല്‍ പ്രതിരോധ സംവിധാനത്തിനെതിരേ ചൈനയും റഷ്യയും ശക്തമായ പ്രതിഷേധവുമായി രംഗത്തെത്തിയിരുന്നു. ഇതിനിടെയാണ് ചൈനയുടെ പുതിയ മിസൈല്‍വേധ പരീക്ഷണം. അതിശക്തമായ റഡാര്‍ സംവിധാനമുള്ള താഡിനു തങ്ങളുടെ അധീനതയിലുള്ള പ്രദേശങ്ങളെ നിരീക്ഷിക്കാനാകുമെന്ന ആശങ്കയാണ് ഈ എതിര്‍പ്പിനു പിന്നില്‍.
അതേസമയം, താഡിനോടുള്ള എതിര്‍പ്പ് തുടരുമ്പോഴും ഇത്തരം സാങ്കേതികവിദ്യയില്‍ തങ്ങളും പിന്നോട്ടില്ലെന്ന സൂചനയാണ് ചൈനയുടെ പുതിയ മിസൈല്‍ പരീക്ഷണം നല്‍കുന്ന സൂചന. റഷ്യയും ഇത്തരം മിസൈല്‍വേധ സംവിധാനങ്ങള്‍ പരീക്ഷിക്കുന്നുണ്ട്.