കൊല്ലം: ദലിത് ദമ്പതികളെ പൊലിസ് വീടുകയറി മര്‍ദിച്ചതായി പരാതി. തട്ടാര്‍കോണം സ്വദേശി സജീവ്, ഭാര്യ രജനി എന്നിവരെയാണ് കിളിക്കൊല്ലൂര്‍ പൊലിസ് സ്‌റ്റേഷനിലെ പൊലിസുകാരായ ഷിഹാബുദ്ദീന്‍, സരസന്‍ എന്നിവര്‍ മര്‍ദിച്ചത്.
ഇന്നലെ പുലര്‍ച്ചെ രണ്ടേമുക്കാലിനായിരുന്നു സംഭവം. ക്ഷേത്രത്തിലെ ഉത്സവവുമായി ബന്ധപ്പെട്ട കേസിനെതുടര്‍ന്ന് സജീവിന്റെ സഹോദരി ഭര്‍ത്താവ് ശിവനെ അന്വേഷിച്ചാണ് പൊലിസുകാര്‍ വീട്ടിലെത്തിയത്. ശിവന്‍ തങ്ങളുടെ വീട്ടിലല്ല താമസിക്കുന്നതെന്ന് സജീവ് പറഞ്ഞെങ്കിലും പൊലിസുകാര്‍ വീടിന്റെ കതക് തള്ളിമറിച്ചിട്ടശേഷം സജീവിനെ പിടിച്ച് തള്ളുകയും തറയിലിട്ട് ചവിട്ടുകയും ചെയ്‌തെന്നാണ് പരാതി. തടയാനെത്തിയ രജനിക്കും മര്‍ദ്ദനമേറ്റു.
സജീവിന്റെ കൈയ്ക്ക് പൊട്ടലുണ്ട്. ജാതിപ്പേര് വിളിച്ച് ആക്ഷേപിച്ച പൊലിസുകാര്‍ ഇനിയും രാത്രി വീട്ടിലെത്തുമെന്ന് ഭീഷണിമുഴക്കിയതായും ഇവര്‍ പറയുന്നു.