ന്യൂയോര്‍ക്ക്: ലൈംഗിക വിവാദത്തില്‍ അകപ്പെട്ട ഹോളിവുഡ് നിര്‍മാതാവ് ഹാര്‍വി വെയ്ന്‍സ്റ്റൈന്റെ കമ്പനിക്കെതിരേ കേസിനു നീക്കവുമായി ന്യൂയോര്‍ക്ക് ഭരണകൂടം. വെയിന്‍സ്റ്റൈനില്‍നിന്നു ജോലിക്കാരെ സംരക്ഷിക്കാന്‍ കമ്പനിക്കു സാധിച്ചില്ലെന്ന ആരോപണമുയര്‍ത്തിയാണ് കമ്പനിക്കെതിരേ ഭരണകൂടം കേസ് ഫയല്‍ ചെയ്തിരിക്കുന്നത്. ലൈംഗിക അതിക്രമ കേസില്‍ പിടിയിലായ ഹാര്‍വിക്കെതിരേ കഴിഞ്ഞയാഴ്ച പ്രമുഖ നായിക ഉമ തെര്‍മനും രംഗത്തെത്തിയിരുന്നു.
ബലാത്സംഗമുള്‍പ്പടെ നിരവധി ലൈംഗിക പീഡന ആരോപണങ്ങളാണ് വെയ്ന്‍സ്റ്റൈനെതിരേ നിലനില്‍ക്കുന്നത്. കമ്പനിയിലെ നിരവധി വനിതാ ജീവനക്കാരെ വെയ്ന്‍സ്റ്റൈന്‍ ഇത്തരത്തില്‍ ഉപയോഗപ്പെടുത്തിയതായി കേസില്‍ പറയുന്നു. വര്‍ഷങ്ങളായി ഇയാള്‍ ഇത് തുടരുകയായിരുന്നുവെന്നും കേസിലുണ്ട്. അതേസമയം ഹാര്‍വിക്കെതിരായ പല ആരോപണങ്ങളും തെളിവില്ലാത്തതാണെന്ന് അദ്ദേഹത്തിന്റെ അഭിഭാഷകന്‍ പറയുന്നു.