തിരുവനന്തപുരം: മന്ത്രിമാര്‍ക്കെതിരേ വിമര്‍ശനവുമായി സി.പി.എം പ്രവര്‍ത്തന റിപ്പോര്‍ട്ട്. മന്ത്രിമാര്‍ അഞ്ചു ദിവസവും സംസ്ഥാനത്തുണ്ടാകണമെന്ന നിര്‍ദേശം നടപ്പായില്ലെന്നും ഇക്കാര്യത്തില്‍ സംസ്ഥാന സമിതിയുടെ തീരുമാനം പലരും പാലിച്ചില്ലെന്നും റിപ്പോര്‍ട്ട് കുറ്റപ്പെടുത്തുന്നു. ഇന്നലെ തുടങ്ങിയ സി.പി.എം സംസ്ഥാനസമിതിയില്‍ റിപ്പോര്‍ട്ട് അംഗീകാരത്തിനായി സമര്‍പ്പിച്ചു. സംസ്ഥാന സമിതിയില്‍ ബിനോയ് കോടിയേരി വിഷയവും പരോക്ഷമായി പരാമര്‍ശിക്കപ്പെട്ടു. മക്കളുടെയും ബന്ധുക്കളുടെയും അനാവശ്യ ഇടപാടുകള്‍ പ്രോത്സാഹിപ്പിക്കരുതെന്ന് കണ്ണൂരില്‍ നിന്നുള്ള കെ.പി സഹദേവന്‍ വിമര്‍ശനമുന്നയിച്ചു. അങ്ങനെയല്ലാതെ എന്തൊക്കെ സംഭവിക്കുന്നുവെന്ന് കാണുന്നുണ്ടല്ലോയെന്നും അദ്ദേഹം ചോദിച്ചു.
പാലക്കാട് പ്ലീനം തീരുമാനം പൂര്‍ണമായും നടപ്പാക്കാനായില്ലെന്നും സ്വഭാവ ദൂഷ്യമടക്കമുള്ള പ്രവണതകള്‍ ഇപ്പോഴും നിലനില്‍ക്കുന്നുണ്ടെന്നും കെ.പി സഹദേവന്‍ പറഞ്ഞു. സംസ്ഥാന സമിതി ഇന്ന് അവസാനിക്കും.