തിരുവനന്തപുരം: ബാര്‍ കോഴയില്‍ സി.പി.എമ്മിനെ വെട്ടിലാക്കി മദ്യ വ്യവസായി ബിജു രമേശിന്റെ വെളിപ്പെടുത്തല്‍. ബാര്‍ കോഴ കേസില്‍ കെ.എം മാണിക്കെതിരേ തെളിവുകള്‍ നല്‍കുകയാണെങ്കില്‍ അധികാരത്തില്‍ തിരിച്ചെത്തുമ്പോള്‍ പൂട്ടിയ ബാറുകള്‍ തുറന്ന് നല്‍കാമെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ ഉള്‍പ്പെടെയുള്ള നേതാക്കള്‍ വാക്കു തന്നിരുന്നുവെന്നും ഭരണത്തിലെത്തിയപ്പോള്‍ ഇവര്‍ കാലുമാറിയെന്നും ബിജുരമേശ് പറഞ്ഞു. ഒരു ചാനലിനു നല്‍കിയ അഭിമുഖത്തിലാണ് ബിജു രമേശിന്റെ തുറന്നു പറച്ചില്‍.
മാണിയെ കേസില്‍ നിന്നും വിശുദ്ധനാക്കാനുള്ള നീക്കങ്ങളാണ് ഉന്നതങ്ങളില്‍ നടക്കുന്നത്. തെളിവിന് വേണ്ടി ജീവന്‍ പണയപ്പെടുത്തിയാണ് മുന്നില്‍ നിന്ന് പോരാടിയത്. എല്ലാ തെളിവുകളും കൊടുത്തു. ഇനി തെളിയിക്കേണ്ടത് സര്‍ക്കാരാണ്.
കേസ് ഒഴിവാക്കി മാണിയെ വെള്ളപൂശിയാല്‍ ഇടതുമുന്നണി വഞ്ചിച്ചുവെന്ന് പറയേണ്ടിവരും. തെളിവ് ലഭിച്ചില്ലെന്ന് പറഞ്ഞ് കേസ് അവസാനിപ്പിക്കുന്നത് ഉന്നതതലത്തില്‍ ആലോചിച്ച് ഉറപ്പിച്ച കള്ളക്കളിയാണെന്നും ബിജു രമേശ് പറഞ്ഞു. തന്നെ മാത്രമല്ല, അഴിമതിവിരുദ്ധ വാഗ്ദാനങ്ങള്‍ വിശ്വസിച്ച ജനങ്ങളെ കൂടിയാണ് വഞ്ചിക്കുന്നതെന്ന് നേതൃത്വം തിരിച്ചറിയണം.
സി.പി.എമ്മിന്റെ പിന്തുണയോടെയല്ലാതെ മാണിക്ക് കുറ്റവിമുക്തനായി തിരിച്ചുവരാന്‍ കഴിയില്ല എന്ന് എല്ലാവര്‍ക്കും അറിയാം. മാണിക്കെതിരേ കേസ് നടത്താന്‍ തന്നെ പ്രോല്‍സാഹിപ്പിച്ചവര്‍ മറുവശത്ത് കൂടി മാണിയുമായി ധാരണ ഉണ്ടാക്കുന്നത് നിരാശപ്പെടുത്തുന്നു. തെളിവ് ലഭിച്ചില്ലെന്ന് പറഞ്ഞ് ബാര്‍കോഴക്കേസ് അവസാനിപ്പിക്കുന്നത് ഉന്നതതലത്തില്‍ ആലോചിച്ച് ഉറപ്പിച്ച കള്ളക്കളിയാണെന്നും ബിജു രമേശ് തുറന്നടിച്ചു. രാഷ്ട്രീയ പിന്തുണ കൊടുത്താല്‍ മാണിക്കെതിരേ തെളിവ് നല്‍കാന്‍ ബാറുടമകള്‍ തയാറാകും. യു.ഡി.എഫ് ഭരണകാലത്ത് സി.പി.എം നേതാക്കള്‍ തന്നെ സമീപിച്ചത് പോലെ ഇപ്പോള്‍ മറ്റ് ബാറുടമകളെ ബന്ധപ്പെടട്ടെ. തെളിവുമായി വരുന്നവര്‍ക്ക് സംരക്ഷണം നല്‍കാന്‍ സി.പി.എം തയാറായാല്‍ മതിയെന്നും ബിജു രമേശ് പറഞ്ഞു. ബാര്‍ കോഴക്കേസില്‍ കെ.എം മാണിയെ കുറ്റവിമുക്തനാക്കാന്‍ വിജിലന്‍സ് നീക്കം നടത്തുന്നുവെന്ന റിപ്പോര്‍ട്ടുകള്‍ക്കിടെയാണ് ബിജു രമേശിന്റെ വെളിപ്പെടുത്തല്‍.