ചെന്നൈ: കുപ്രസിദ്ധ ഗുണ്ടയായ ബിനു അമ്പാട്ടൂര്‍ ഇന്നലെ കോടതിയില്‍ കീഴടങ്ങി. കഴിഞ്ഞ ആറാം തിയതിയാണ് ഇയാളുടെ സങ്കേതത്തില്‍ പിറന്നാള്‍ ആഘോഷത്തിനിടെ പൊലിസ് റെയ്ഡ് നടത്തിയത്. ആഘോഷത്തിനെത്തിയ 73 ഗുണ്ടകളെ പൊലിസ് അറസ്റ്റ് ചെയ്തിരുന്നു.നൂറിലധികം പേരാണ് പിറന്നാള്‍ പരിപാടിക്കെത്തിയിരുന്നത്. പൊലിസ് എത്തിയതോടെ ഗുണ്ട ബിനു അടക്കം 20 പേര്‍ ഓടി രക്ഷപ്പെട്ടിരുന്നു. ഇയാള്‍ക്കുവേണ്ടി തമിഴ്‌നാട്ടിലെ സേലം, കൃഷ്ണഗിരി, വെല്ലൂര്‍ എന്നിവിടങ്ങള്‍ക്ക് പുറമെ കേരളത്തിലേക്കും പൊലിസ് അന്വേഷണം വ്യാപിപ്പിച്ചിരുന്നു.
രക്ഷപ്പെട്ട ബിനുവിനെതിരെ അന്വേഷണം ഊര്‍ജിതമാക്കിയതിനിടയിലാണ് ഇയാള്‍ കോടതിയില്‍ കീഴടങ്ങിയത്. ബിനുവിനെ കണ്ടാല്‍ ഉടന്‍ വെടിവയ്ക്കാന്‍ പൊലിസ് ഉത്തരവിട്ടിരുന്നു. തൃശൂര്‍ സ്വദേശിയായ ചൂളൈമേട് ബിന്നി പാപ്പച്ചനാണ് (45) ഗുണ്ട ബിനുവെന്ന പേരില്‍ അറിയപ്പെടുന്നത്. ജന്മദിനാഘോഷത്തിനു എത്തിയ ഗുണ്ടാ സംഘം അമ്പത്തൂരിന് സമീപം ഔട്ടര്‍ റിങ് റോഡില്‍ ഗതാഗത തടസം സൃഷ്ടിച്ചിരുന്നു. അരിവാള്‍, കത്തി തുടങ്ങിയ ആയുധങ്ങളുമായിട്ടാണ് സംഘം എത്തിയിരുന്നത്.