അഗര്‍ത്തല: ഇടതുപക്ഷത്തിന് പിടിച്ചുനില്‍ക്കാനാകുമെന്ന് വിശ്വസിക്കുന്ന ത്രിപുരയില്‍ എങ്ങനെയും അധികാരത്തിലേറാന്‍ ബി.ജെ.പി നടത്തുന്ന പ്രചാരണം ശക്തമാക്കിയിരിക്കെ ഇതിനെതിരേ രൂക്ഷമായ വിമര്‍ശനവുമായി മുഖ്യമന്ത്രി മണിക് സര്‍ക്കാര്‍.
സംസ്ഥാനത്ത് ബി.ജെ.പി നടത്തുന്നത് തീക്കളിയാണെന്നും അധികാരത്തിലേറാന്‍ വിഘടനവാദികളെ കൂട്ടുപിടിച്ചാണ് അവര്‍ തെരഞ്ഞെടുപ്പിനെ നേരിടുന്നതെന്നും അദ്ദേഹം ആരോപിച്ചു.
ത്രിപുരയില്‍ തെരഞ്ഞെടുപ്പ് പ്രചാരണത്തിന് എത്തിയ മോദി, മണിക് സര്‍ക്കാരിനെ പരിഹസിക്കുകയും സംസ്ഥാനത്ത് നിന്ന് മണിക്(മുത്ത്), ഹീര(വജ്രം) എന്നിവയെ പുറത്താക്കാനുള്ള അനുയോജ്യമായ സമയമാണിതെന്നും പറഞ്ഞിരുന്നു. ഒരു പ്രധാനമന്ത്രിയില്‍ നിന്ന് ഒരിക്കല്‍പോലും ഉണ്ടാകാന്‍ പാടില്ലാത്ത വാക്കുകളാണ് ഇതെന്ന് മുഖ്യമന്ത്രി ആരോപിച്ചു. വ്യക്തികളെ ആക്രമിക്കുന്ന രീതിയെ ഒരിക്കല്‍ പോലും ത്രിപുരയിലെ ജനങ്ങള്‍ അംഗീകരിക്കില്ലെന്നും മണിക് സര്‍ക്കാര്‍ കൂട്ടിച്ചേര്‍ത്തു.
ഈ മാസം 18ന് നടക്കുന്ന തെരഞ്ഞെടുപ്പില്‍ ഇടതുപക്ഷം മുന്‍പെങ്ങുമില്ലാത്ത വിധത്തിലാണ് പ്രചാരണം നടത്തുന്നത്. എട്ടാം തവണയും ഇടതുമുന്നണി അധികാരത്തില്‍ വരുമെന്ന പ്രതീക്ഷയിലാണ് മണിക് സര്‍ക്കാര്‍. സംസ്ഥാനത്ത് ഇടതുപക്ഷത്തിന്റെ മുഖ്യ എതിരാളി ബി.ജെ.പിയാണ്. സംസ്ഥാനത്ത് ബി.ജെ.പിയുടെ സഖ്യകക്ഷിയാകട്ടെ വിഘടനവാദി സംഘടനയായ ഇന്‍ഡിജിനസ് പീപ്പിള്‍സ് ഫ്രണ്ടാണ്. അവിശുദ്ധ കൂട്ടുകെട്ടാണ് ഇവിടെ ബി.ജെ.പി ഉണ്ടാക്കിയിരിക്കുന്നതെന്നും മണിക് സര്‍ക്കാര്‍ ആരോപിച്ചു.