ന്യൂഡല്‍ഹി: സൊഹ്‌റാബുദ്ദീന്‍ ഷെയ്ഖ് വ്യാജ ഏറ്റുമുട്ടല്‍ കേസിലെ മുഴുവന്‍ പ്രതികളോടും നേരിട്ട് ഹാജരാകാന്‍ സി.ബി.ഐ കോടതി ഉത്തവിട്ടു.
രാജസ്ഥാന്‍, ഗുജറാത്ത് എന്നിവിടങ്ങളില്‍ നിന്നുള്ള മുതിര്‍ന്ന പൊലിസ് ഉദ്യോഗസ്ഥരുള്‍പ്പെടെയുള്ള 22 പേരോടാണ് ഹാജരാകാന്‍ മുംബൈയിലെ പ്രത്യേക സി.ബി.ഐ കോടതി ജഡ്ജി എസ്.ജെ ശര്‍മ ആവശ്യപ്പെട്ടത്.
നേരിട്ടു ഹാജരാകുന്നതില്‍ നിന്ന് ഒഴിവാക്കണമെന്ന് മിക്ക പ്രതികളും അഭിഭാഷകര്‍ മുഖേന ആവശ്യപ്പെട്ടിട്ടുണ്ടെങ്കിലും ഇതു തള്ളിയാണ് കോടതിയുടെ നടപടി.
കേസില്‍ പ്രതിദിനം നടക്കുന്ന വിചാരണയില്‍ ഹാജരാകാത്ത പക്ഷം ശക്തമായ നടപടി സ്വീകരിക്കുമെന്നും ജഡ്ജി വ്യക്തമാക്കി. ചൊവ്വാഴ്ച കേസ് പരിഗണിക്കുന്നതിനിടെ, സാക്ഷികളെ ക്രോസ് വിസ്താരം ചെയ്യാനായി പ്രതികളുടെ അഭിഭാഷകരോട് കോടതി ആവശ്യപ്പെട്ടെങ്കിലും ആ സമയം അവര്‍ ഹാജരായിരുന്നില്ല.
22 പേരില്‍ രണ്ടുപേര്‍ മാത്രമാണ് കോടതിയില്‍ നേരിട്ട് ഹാജരായത്. ചിലര്‍ക്കു പകരമായി അഭിഭാഷകരും ഹാജരായി. ഇതേതുടര്‍ന്നാണ് മുഴുവന്‍ പേരും ഹാജരാകണമെന്ന് കോടതി ആവശ്യപ്പെട്ടത്.
കേസില്‍ സ്വതന്ത്രവിചാരണ നടക്കേണ്ടതുണ്ടെന്നു ചൂണ്ടിക്കാട്ടി 2012ലാണ് കേസ് ഗുജറാത്തിനു പുറത്തേക്ക് മാറ്റിയത്.
ഈ സമയം മുംബൈയില്‍ താമസിക്കാന്‍ സ്ഥലസൗകര്യങ്ങള്‍ ഇല്ലാത്തതിനാല്‍ കോടതിയില്‍ നേരിട്ടു ഹാജരാകുന്നതില്‍ നിന്ന് ഒഴിവാക്കണമെന്ന് പ്രതികള്‍ ആവശ്യപ്പെട്ടിരുന്നു.
എന്നാല്‍ ഈ ആവശ്യം തള്ളിയ കോടതി, പ്രതിദിനവിചാരണയ്ക്ക് പ്രതികളുടെ സാന്നിധ്യം ആവശ്യമാണെന്ന് അറിയിച്ചു.
കഴിഞ്ഞദിവസം കേസില്‍ വാദംകേള്‍ക്കുന്നതിനിടെ സാക്ഷികള്‍ തുടര്‍ച്ചയായി കൂറുമാറുന്നത് അതീവഗൗരവമുള്ള കാര്യമാണെന്നു ഹൈക്കോടതി നിരീക്ഷിച്ചിരുന്നു.
സാക്ഷികളെ സംരക്ഷിക്കല്‍ നിങ്ങളുടെ ചുമതലയല്ലേയെന്നും കോടതി സി.ബി.ഐയോട് ചോദിച്ചിരുന്നു.
എന്നാല്‍, ഭീഷണിയോ മറ്റു വല്ല സ്വാധീനത്തിനോ തങ്ങള്‍ വിധേയമാകുന്നതു സംബന്ധിച്ച് സാക്ഷികളാരും പരാതിപറഞ്ഞിട്ടില്ലെന്ന് സി.ബി.ഐ ഹൈക്കോടതിയെ അറിയിച്ചു.