ഹൈദരാബാദ്: ആന്ധ്രാപ്രദേശിന് പ്രത്യേക പാക്കേജ് അനുവദിക്കാത്തതില്‍ പ്രതിഷേധിച്ച് കേന്ദ്ര മന്ത്രിസഭയില്‍ നിന്ന് പാര്‍ട്ടിയുടെ രണ്ട് മന്ത്രിമാരെ പിന്‍വലിച്ചെങ്കിലും എന്‍.ഡി.എയില്‍ നിന്ന് ഉടന്‍ വിടില്ലെന്ന് ടി.ഡി.പി അധ്യക്ഷനും ആന്ധ്രാപ്രദേശ് മുഖ്യമന്ത്രിയുമായ എന്‍. ചന്ദ്രബാബു നായിഡു.
മാര്‍ച്ച് 23ന് നടക്കുന്ന രാജ്യസഭാ തെരഞ്ഞെടുപ്പില്‍ മൂന്ന് പേരെ വിജയിപ്പിച്ചെടുക്കണമെങ്കില്‍ സംസ്ഥാന നിയമസഭയിലെ ബി.ജെ.പി അംഗങ്ങളുടെ പിന്തുണ വേണമെന്ന തിരിച്ചറിവാണ് മുന്നണിയില്‍ നിന്ന് തല്‍ക്കാലം വിടേണ്ടതില്ലെന്ന തീരുമാനത്തിന്റെ അടിസ്ഥാനം.
രണ്ടുപേരെ ടി.ഡി.പിക്ക് മറ്റാരുടേയും പിന്തുണയില്ലാതെ വിജയിപ്പിച്ചെടുക്കാനാകുമെങ്കിലും മൂന്നാമത്തെ സ്ഥാനാര്‍ഥിക്ക് വിജയിക്കാനുള്ള 44 പേരുടെ പിന്തുണ ഉറപ്പിക്കണമെങ്കില്‍ ബി.ജെ.പി സഹായം അനിവാര്യമാണ്. ഇത് മുന്നില്‍ കാണുന്നതുകൊണ്ടാണ് തല്‍ക്കാലം മുന്നണി വിടേണ്ടതില്ലെന്ന തീരുമാനമെടുക്കാന്‍ ചന്ദ്രബാബു നായിഡുവിനെ പ്രേരിപ്പിച്ചത്. അതേസമയം അവസരത്തിനൊത്ത് മുന്നണി ബന്ധം സ്വീകരിക്കുന്ന ചന്ദ്രബാബു നായിഡു, 2019ലെ ലോക്‌സഭാ തെരഞ്ഞെടുപ്പില്‍ എന്‍.ഡി.എ മുന്നണിയില്‍ ഉണ്ടാകുമോയെന്ന കാര്യത്തില്‍ ഇതുവരെ നിലപാട് വ്യക്തമാക്കിയിട്ടുമില്ല.