അലിഗഢ്: മുസ്‌ലിം യുവാക്കള്‍ക്കെതിരേ വര്‍ധിച്ചുവരുന്ന തീവ്രവാദ കേസുകള്‍ ആശങ്ക ജനിപ്പിക്കുന്നതാണെന്ന് കേന്ദ്ര നിയമ മന്ത്രി സദാനന്ദ ഗൗഡ. നരേന്ദ്ര മോദി സര്‍ക്കാരിന്റെ രണ്ടാം വാര്‍ഷികത്തോടനുബന്ധിച്ച് അലിഗഢില്‍ ചേര്‍ന്ന വികാസ് പര്‍വ ആഘോഷങ്ങളില്‍ പങ്കെടുത്തു സംസാരിക്കവെയാണ് മന്ത്രി ഇക്കാര്യം പറഞ്ഞത്.

ഇന്ത്യയിലെ മുസ്‌ലിം വിഭാഗങ്ങള്‍ ദീര്‍ഘനാളായി നേരിടുന്ന യാതനകള്‍ക്ക് അറുതിവരുത്താന്‍ നിയമ പരിഷ്‌കരണം ആവശ്യമാണെന്നും മന്ത്രി പറഞ്ഞു. പലപ്പോഴും മുസ്‌ലിം യുവാക്കള്‍ക്കെതിരായ ഭീകരവാദ കേസുകള്‍ കോടതിയിലെത്തുമ്പോള്‍ തെളിവില്ലെന്ന കാരണത്താല്‍ തള്ളപ്പെടുകയാണ് ചെയ്യുന്നത്. ഇത്തരം പ്രതിസന്ധികളെ മറികടക്കുന്നതിന് നിയമപരിഷ്‌കരണം അടിയന്തിരമായി നടപ്പാക്കേണ്ടതുണ്ടെന്നും മന്ത്രി അഭിപ്രായപ്പെട്ടു. ക്രിമിനല്‍ നിയമത്തില്‍ മാറ്റം കൊണ്ടുവരുന്നകാര്യം ലോ കമ്മിഷന്‍ പഠിച്ചുകൊണ്ടിരിക്കുകയാണ്. സുപ്രീം കോടതി ജഡ്ജി അധ്യക്ഷനായുള്ള സമിതിയാണ് ഇക്കാര്യം പഠിച്ചുകൊണ്ടിരിക്കുന്നതെന്നും മന്ത്രി പറഞ്ഞു. സമാനരീതിയിലുള്ള അഭിപ്രായപ്രകടനം ആഭ്യന്തരമന്ത്രി രാജ്‌നാഥ് സിങും നടത്തിയിരുന്നു.

1994 ജനുവരി 15ന് പൊലിസ് തട്ടിക്കൊണ്ടുപോയി ഭീകരവാദ കേസില്‍ ജയിലിലടച്ചിരുന്ന നിസാറെന്ന യുവാവിനെ 23 വര്‍ഷത്തിനുശേഷം കഴിഞ്ഞ ദിവസം ജാമ്യം ലഭിച്ചിരുന്നു. സുപ്രിം കോടതിയായിരുന്നു നിസാറിന് ജാമ്യം നല്‍കിയത്. രാജ്യത്തെ വിവിധ ജയിലുകളില്‍ നിരപരാധികളായ ആയിരകണക്കിന് യുവാക്കളാണ് ജാമ്യം കിട്ടാതെയും വിചാരണ നടക്കാതെയും കഴിയുന്നത്. എന്നാല്‍ സദാനന്ദ ഗൗഡയുടെ അഭിപ്രായപ്രകടനം ബി.ജെ.പിയില്‍ അസ്വാരസ്യങ്ങള്‍ ഉണ്ടാക്കുന്നതായും റിപ്പോര്‍ട്ടുണ്ട്.