മലപ്പുറം: ഒന്‍പത് യുവതികളുടെ ജീവിതസ്വപ്നങ്ങള്‍ക്ക് മിഴിവേകി പാണക്കാട് സയ്യിദ് ഉമറലി ശിഹാബ് തങ്ങളുടെ ഉറൂസ് സമാപിച്ചു. ഉമറലി ശിഹാബ് തങ്ങള്‍ വെഡ്ഡിങ് എയ്ഡ് (ഉസ്‌വ) എന്ന പേരില്‍ ജില്ലാ സുന്നി യുവജന സംഘത്തിന്റെ നേതൃത്വത്തിലാണ് പരിപാടി സംഘടിപ്പിച്ചത്.

സംഘടനാ പ്രവര്‍ത്തകരുടെ പെണ്‍മക്കളുടെ വിവാഹത്തിന് പത്ത് പവന്‍ വീതമാണ് സഹായം നല്‍കിയത്. ഇന്നലെ പാണക്കാട് ജുമാമസ്ജിദില്‍ നടന്ന നികാഹിന് സയ്യിദ് സാദിഖലി ശിഹാബ് തങ്ങള്‍, സയ്യിദ് അബ്ബാസലി ശിഹാബ് തങ്ങള്‍, സയ്യിദ് ബശീറലി ശിഹാബ് തങ്ങള്‍, സയ്യിദ് റശീദലി ശിഹാബ് തങ്ങള്‍, സയ്യിദ് ഹമീദലി ശിഹാബ് തങ്ങള്‍, സയ്യിദ് ശമീറലി ശിഹാബ് തങ്ങള്‍, സയ്യിദ് മുഹമ്മദ് കോയ തങ്ങള്‍ ജമലുല്ലൈലി, കെ. ആലിക്കുട്ടി മുസ്‌ലിയാര്‍, എം.ടി അബ്ദുല്ല മുസ്‌ലിയാര്‍ എന്നിവര്‍ നേതൃത്വം നല്‍കി. ആദൃശ്ശേരി ഹംസ കുട്ടി മുസ്‌ലിയാര്‍ ഖുത്വുബ നിര്‍വഹിച്ചു. നികാഹിന് മുന്നോടിയായി ഉമറലി ശിഹാബ് തങ്ങളുടെ പുത്രന്‍ സയ്യിദ് ഹമീദലി ശിഹാബ് തങ്ങളുടെ വസതിയില്‍ മൗലിദ് പാരായണം, ദിക്ര്‍ ഹല്‍ഖ, അനുസ്മരണ പ്രഭാഷണം എന്നിവ നടന്നു.