ന്യൂഡല്‍ഹി: രാജ്യം കണ്ട ഏറ്റവും വലിയ കള്ളത്തരമായിരുന്നു മോദിയുടെ നോട്ടുനിരോധനമെന്ന് കോണ്‍ഗ്രസ് നേതാവും മുന്‍കേന്ദ്ര ധനമന്ത്രിയുമായ പി. ചിദംബരം. രാജ്യത്തെ തൊഴില്‍ മേഖലയെ പൂര്‍ണമായി നശിപ്പിക്കുകയും തൊഴിലവസരങ്ങള്‍ ഇല്ലാതാക്കുകയും ചെയ്തതും ഇതിന്റെ പ്രത്യാഘാതമായിരുന്നുവെന്നും അദ്ദേഹം ആരോപിച്ചു.
കോണ്‍ഗ്രസ് പ്ലീനറി സമ്മേളനത്തില്‍ ഇന്ത്യയുടെ സാമ്പത്തിക നയത്തെക്കുറിച്ച് അവതരിപ്പിച്ച പ്രമേയത്തിലാണ് ചിദംബരം ഇക്കാര്യം ചൂണ്ടിക്കാട്ടിയത്. നോട്ട് നിരോധനത്തിന് പിന്നാലെ ജി.എസ്.ടി കൂടി നടപ്പാക്കിയതോടെ ജനങ്ങളെ ദാരിദ്ര്യത്തിലേക്ക് തള്ളിവിടുകയാണ് കേന്ദ്രം ചെയ്തത്.
നോട്ട് നിരോധനത്തെ തുടര്‍ന്ന് പിന്‍വലിച്ച നോട്ടുകള്‍ എത്ര തിരിച്ചെത്തിയെന്നതിനെക്കുറിച്ച് വ്യക്തമായ വിവരം നല്‍കാന്‍ ഇതുവരെ ആര്‍.ബി.ഐക്ക് കഴിഞ്ഞിട്ടില്ല. ഇപ്പോഴും നോട്ടുകള്‍ എണ്ണിക്കൊണ്ടിരിക്കുകയാണെന്നാണ് ആര്‍.ബി.ഐ പറയുന്നതെന്നും അദ്ദേഹം ആരോപിച്ചു.